एसटी बसचालकाचा मनमानी कारभार

नेहमीच्या मार्गाला फाटा; बसची अन्य मार्गाने वाहतूक

| चिरनेर | वार्ताहर |

केळवणे गावावरून सकाळी आठ वाजता सुटणारी आणि पनवेल एसटी बस आगारात जाणारी ही एसटीची बस पनवेल आगारातील बसचालक प्रवाशांच्या सोयीकरिता असणार्‍या नेहमीच्या मार्गाने, म्हणजे गव्हाणफाटा या मुख्य मार्गावरून न नेता, स्वतःच्या मनमानीने महामार्गावरुन नेत असल्यामुळे महिला प्रवाशांबरोबर गव्हाणफाटा येथे उतरणार्‍या सर्वच प्रवाशांना कमालीचा त्रास सहन करावा लागत आहे. वारंवार सूचना देऊनदेखील आणि तीन वेळा याबाबत त्याच्याविरोधात पनवेल बस आगारात तक्रार करूनदेखील हा चालक प्रवाशांचे ऐकून घ्यायला तयारच नाही. तो त्याच्या मनमानीनेपणे महामार्गावरुन बस नेत आहे. त्यामुळे गव्हाण फाटा येथे नियमित उतरणार्‍या नोकरदार महिला प्रवाशांना मोठ्या प्रमाणावर मनस्ताप सहन करावा लागत आहे. नाईलाजाने या महिला प्रवाशांना वरच्या महामार्गावरुन खाली उतरून, पुन्हा अडगळीच्या दगड धोंड्याच्या निर्जन जंगल भागातून खाली उतरून गव्हाणफाटा या बसथांब्यावर उन्हातान्हातून पंधरा मिनिटे चालत यावे लागत आहे. त्यानंतर येथून वाहने पकडून नियोजित स्थळी पोहोचण्याचा पुढचा प्रवास करावा लागत आहे.

दरम्यान, चालकाविरोधात महिलावर्गातून संताप व्यक्त केला जात आहे. याबाबत रायगड जिल्हा महिला अध्यक्षा जयवंती गोंधळी यांनी पुढाकार घेत, महिला प्रवाशांना सोबत घेऊन शनिवारी (दि. 4) पनवेल आगारात उपआगार प्रमुख रोहन खलिपे यांची भेट घेतली. यावेळी प्रवाशांच्या परिस्थितीची जाणीव करून दिली. यावेळी रोहन खलिपे यांनी ही गंभीर बाब लक्षात घेऊन प्रवाशांना सुखकर प्रवासाचे आश्‍वासन दिले.

चिरनेर मार्गावरून केळवणे, आवरे या गावांकडे जाणार्‍या एसटी बस गाड्यांवर या चालकाची ड्युटी यापुढे लावणार नाही. तसेच गव्हाणफाटा या नेहमीच्या मार्गाने या मार्गावरील एसटीच्या प्रवासी गाड्या धावतील याची खात्री देतो आणि जबाबदारी घेतो.

रोहन खलिपे
पनवेल एसटी बस उपआगार प्रमुख

नेहमीचा गव्हाणफाटा बसथांबा सोडून हा चालक वरच्या महामार्गावरून बस नेत असल्यामुळे महिलांना उन्हातान्हाचा त्रास तर सहन करावा लागत आहे. अशा मनमानीपणे वागणार्‍या चालकाची आमच्या प्रवासाच्या मार्गावर ड्युटी लावू नका.

जयवंती गोंधळी,
रायगड जिल्हा महिला अध्यक्षा