लुटमार करणारे गुन्हेगार गजाआड

। पनवेल । वार्ताहर ।

पनवेल परिसरात वाहन भाडे तत्वावर ऑफलाईन बुक करून निर्जनस्थळी काही बहाण्याने उतरुन संबंधित चालकाला चाकूचा धाक दाखवून गाडीसह चालकाला लुटून पसार होणार्‍या सराईत गुन्हेगारांना तळोजा पोलिसांनी गजाआड केले आहे. तसेच, त्यांच्याकडून आतापर्यंत 4 गुन्हे उघडकीस करण्यात आले आहेत.

तळोजा पोलीस ठाण्याच्या हद्दीत अशा प्रकारचे दोन गुन्हे त्याचप्रमाणे पनवेल तालुका पोलीस ठाण्याच्या हद्दीत व कल्याण पोलीस ठाण्याच्या हद्दीत प्रत्येकी एक गुन्हा अशा प्रकारचे 4 गुन्हे दाखल करण्यात आले होते. यानंतर तळोजा पोलीस ठाण्याचे वपोनि प्रवीण भगत, पो.नि. गुन्हे निकम, पो. उपनिरीक्षक धुळगंडे, पो. हवालदरी मढवी, शिंदे, सावंत, पाटील, पोलीस कॉस्टेबल जाधव आदींच्या पथकाने या परिसरातील तांत्रीक तपासाच्या आधारे अधिक माहिती घेतली. यावेळी गुन्ह्यातील प्रमुख आरोपी सागर गोयल (25) व त्याचा सहकारी संतोष नाटेकर (27) हे हाजीमलंग कल्याण परिसरात लपल्याची माहिती मिळली. तळोजा पोलिसांनी सलग तीन दिवस त्या ठिकाणी सापळा रचून या दोघांना ताब्यात घेतले. त्यांच्याकडून आतापर्यंत 2 लाख रुपये किंमतीचा मुद्देमाल तसेच गुन्ह्यातील सेलेरिओ गाडी हस्तगत करण्यात आली आहे. या आरोपींमुळे अजूनही काही गुन्हे उघडकीस येण्याची शक्यता वर्तविण्यात येत आहे.