नर्सिंगच्या विद्यार्थिनीवर हल्ला

विनयभंगाचा गुन्हा दाखल

| पेण | प्रतिनिधी |

दिनेश कडू व संगीता राजभर या दोघांनी बीएससी नर्सिंगच्या विद्यार्थिनीवर हल्ला करून तिला व तिच्या आई-वडिलांना लाथाबुक्क्यांनी मारहाण केली आहे. या प्रकरणातील पीडित विद्यार्थिनीने पेण पोलीस ठाण्यात गुन्हा दाखल केला असून, तिने दिलेल्या माहितीनुसार पेण पोलीस ठाण्यात गुन्हा दाखल करण्यात आला आहे.

याबाबत सविस्तर वृत्त असे की, पीडित विद्यार्थिनी आपले कॉलेज उरकून घरी परत येत असताना रस्त्यात मुद्दामहून संगीता राजभर हिने अडथळा निर्माण केला आणि नंतर तिने रस्ता सोडण्यास नकार देऊन पीडितेला शिवीगाळ सुरू केली. तसेच तिच्या स्कुटीचीदेखील तोडफोड केली. या भांडणाचा आवाज पीडितेच्या वडिलांनी ऐकल्यावर ते त्याठिकाणी आले. ते येताच शेजारी असलेल्या दिनेश कडू याने पीडितेच्या वडिलांना मारहाण केली तसेच विद्यार्थिनीच्या कुर्तीला धरून ती फाडून गळ्यावर नखे मारली. गालावरही मारहाण केली. त्यानंतर पीडितेची आई थोड्या वेळेने आली असता तिलादेखील दिनेश कडू याने मारहाण केली. यामध्ये पीडितेच्या आईवडिलांना जबर मारहाण करण्यात आली आहे. याबाबत पीडितेने रितसर तक्रार पोलीस ठाण्यात केली आहे. त्यानंतर यातील आरोपी दिनेश कडूला पोलिसांनी ताब्यात घेऊन त्याविरूद्ध 12 तासांसाठी कलम 170 बीएनएसनुसार लॉकअपमध्ये ठेवले होते. येत्या काही दिवसात या प्रकरणाचे आरोपपत्र न्यायालयात सादर करण्यात येणार असल्याची माहिती पोलिसांनी दिली. असे असले तरी पीडित मुलीच्या मनात दिनेश कडू आणि संगीता राजभर यांच्याबाबत दहशत निर्माण झाली आहे. त्यामुळे भविष्यात त्यांच्यामुळे त्रास होऊ शकतो, असे पीडितेने प्रसारमाध्यमांशी बोलताना सांगितले.