प्रकाश कांबळेंवर हल्लाचा प्रयत्न

हल्लेखोर पोलिसांच्या ताब्यात
| उरण | वार्ताहर |
उरण तालुक्यातील बौद्धवाडा येथील सामाजिक कार्यकर्ते प्रकाश कांबळे यांना पिस्तुल दाखवून हल्ला करण्याचा प्रयत्न करणार्‍या आरोपीस उरण पोलिसांनी काही क्षणातच अटक करण्यात यश मिळविले आहे. प्रकाश कांबळे हे काल दि.10 फेब्रुवारी 2023 रोजी रात्री नेहमीप्रमाणे आनंदनगर येथे मित्रासमवेत उभे होते. त्यावेळी साईसागर ड्रायफ्रूट दुकान परिसरात रात्री 8.30 वाजता बोलाचाली सुरू होती, त्याठिकाणी जाऊन त्यांनी ती सोडविण्यासाठी प्रयत्न केले. त्यावेळी आरोपीने प्रकाश कांबळे यांना बाजूला घेऊन त्यांच्या पोटावर पिस्तुलसारखे शस्त्र लावून मारण्याची धमकी दिली. यादरम्यान प्रकाश कांबळे याचे नातेवाईक व मित्रमंडळी जमा झाल्यानंतर आरोपी घटनास्थळावरून पळून जाण्यात यशस्वी झाला.

या घटनेनंतर तक्रारदार प्रकाश कांबळे यांनी पोलिसांना खबर देताच घटनास्थळी दाखल झाली. यावेळी आरोपी कामगार वसाहत येथे असल्याचा सुगावा पोलिसांना लागताच त्यांनी आरोपी दर्शन विलास नाईक अटक केली आहे. सदर आररोपी हा उरण नागाव येथील असून, तो कौटुंबिक संबंधामुळे वैफल्यग्रस्त झाल्याने त्यांनी असे कृत्य केल्याचे बोलले जात आहे. याप्रकरणी उरण पोलिसांनी दर्शन नाईक याच्यावर गुन्हा दाखल केला आहे. पुढील तपास वरिष्ठ पोलीस निरीक्षक सुनील पाटील यांच्या मार्गदर्शनाखाली सुरू आहे.