अविरत मराठी चित्रपट होणार लवकरच प्रदर्शित

उरणच्या कलाकारांचा समावेश
। उरण । वार्ताहर ।
माणसाने नेहमी ध्येयवादी असावे याचा प्रत्यक्ष अनुभव रायगड मधील उरण तालुक्यातील कोंढरी करंजा गावातील एका ध्येयवेड्या अशा तरुणाकडून अर्थात मिलिंद भाऊ म्हात्रे यांच्या कडून आला. त्यांच्या मनात कुठेतरी आपण काहीतरी वेगळं करण्याची इच्छा होती. आणि त्यांनी आपल्याकडे असलेल्या गुणवत्तेला न्याय देत चित्रपटाचे लेखन करण्यास सुरुवात केली. समाजात एक सामाजिक संदेश, धार्मिक आणि संस्कारक्षम जीवनाचे दर्शन घडविणार्‍या चित्रपटाचे लेखन करण्यात आले. परंतु आपण काही व्यावसायिक चित्रपट लेखक नाही त्यामुळे कुणीही निर्माता आपला चित्रपट तयार करतील का ? असे वाटत असताना मनाचा निग्रह व अगम्य इच्छाशक्तीच्या जोरावर राजेश पवार सोलापूर यांच्या मदतीने स्वतः लेखक, दिग्दर्शक, निर्माता आणि कलाकार अशी भूमिका पार पाडत अविरत या चित्रपटाचे शिवधनुष्य लीलया पेलून हा सिनेमा येत्या 6 मे रोजी आपल्या जवळच्या चित्रपटगृहात प्रदर्शित होत आहे.
विशेष म्हणजे या चित्रपटात ठराविक कलाकार सोडले तर मिलिंदजी म्हात्रे यांनी आपल्या जय हनुमान कलामंचच्या बालकलाकार व कलाकार यांना संधी दिली आहे. कुठलाही पुढचा मागचा विचार न करता चित्रपट काढणे व गावच्या कलाकारांना संधी देणे या सारखा मोठेपणा असूच शकत नाही.तसेच कोंढरी करंजा गावचे आराध्य दैवत श्री हनुमान देव आणि त्यांच्या आशिर्वादाने आजपर्यंत प्रवास यशस्वी झाला. त्याचमंदीरात मिलिंदजी म्हात्रे आणि जय हनुमान कलामंचने या चित्रपटाचे पोस्टर प्रदर्शन केले.
गेली पंधरा वर्षे अविरत मेहनत घेणार्‍या मिलिंद म्हात्रे व जय हनुमान कलामंच यांचा अविरत चित्रपट नजीकच्या चित्रपटगृहात 6 मे पासून झळकत आहे. सदर चित्रपटात बाल वयातील एका गरीब व एका श्रीमंत मुलांची कहाणी असून श्रीमंत मुलगा आपल्या मैत्री पोटी गरीब मुलात राहून संस्कारमय समाज जीवनाचे दर्शन आपल्या कुटुंबाला कसे घडवितो हेच सांगण्याचा प्रयत्न केला आहे. तसेच यातील सुंदर गीते ही झी वाहिनीच्या माध्यमातून प्रदर्शित झाली असून ट्रेलर व टीजर ही प्रदर्शित झाले आहेत. वेगवेगळ्या ठिकाणी जाऊन प्रमोशन देखील करण्यात आले आहे.