बिबट्या वैरी नाही, शेजारी आहे!

पुणे रेस्क्यू चॅरिटेबल ट्रस्टचे नागरिकांना प्रबोधन

। खोपोली । वार्ताहर ।

बिबट्या वैरी नाही, शेजारी.. असा संदेश देणारा प्रबोधनपर कार्यक्रम खोपोलीतील विहारी ठाकूरवाडी येथे खालापूर वनपरिक्षेत्र अधिकारी राजेंद्र पवार यांच्या मार्गदर्शनाखाली पुणे रेस्क्यू चॅरिटेबल ट्रस्टच्या माध्यमातून साकारण्यात आला.

काही दिवासांपूर्वी खालापूर तालुक्यात विविध ठिकाणी झालेले बिबट्याचे दर्शन आणि त्यामुळे जनमानसात निर्माण झालेली त्याची दहशत दूर करण्यासाठी विहारी ठाकूरवाडी येथील ग्रामस्थांसोबत रेस्क्यू चॅरिटेबल ट्रस्टचे नरेश चांडक आणि सायली पिलाने यांनी संवाद साधत चर्चा केली. अत्यंत सोप्या भाषेत दृकश्राव्य माध्यमातून त्यांनी स्थानिक नागरिकांना बिबट्याबाबत सविस्तर माहिती सांगितली.

बिबट्या हा वन्य आणि भटक्या प्राण्यांचीच शिकार करतो. त्यामुळे मानव हा त्याचा भक्ष नसून तो मानवाला घाबरतो हे उदाहरणांसह पटवून देण्यात आले. आपापली पाळीव जनावरे गोठ्यात बांधून ठेवावी. परिसर स्वच्छ ठेवावा जेणेकरून कुत्री आणि डुक्कर यांच्यासारखे भटके प्राणी आपल्या परिसरात वावरणार नाहीत याची दक्षता घ्यावी, असे आवाहन करण्यात आले. तसेच, बिबट्याची माहिती मिळताच घाबरून न जाता 1926 या टोल फ्री क्रमांकावर किंवा वनखात्याशी संपर्क साधावा, अशी सूचनाही करण्यात आली.

त्याचसोबत उपस्थितांच्या शंकांचे निवारणदेखील करण्यात आले. या जनजागृतीचा हेतू पर्यावरणपूरक असल्याचे नारायण निरगुडा आणि विहारी ठाकूरवाडी ग्रामस्थांनी सांगितले. वनपाल भगवान दळवी, वनरक्षक नितीन कराडे, चंदन नागरगोजे, शीतल साळुंखे, संतोषी बस्तेवाड, राजेश्री मुसनर, अपघातग्रस्तांच्या सामाजिक संस्थेचे गुरुनाथ साठेलकर, अमोल ठकेकर यांच्यासह अनेकांनी आपली उपस्थिती दर्शवून वार्तालाप केला. या कार्यक्रमात ज्येष्ठ ग्रामस्थांसह महिला, युवक तसेच बालगोपाळांनी सहभाग घेतला होता.