| रोहा | प्रतिनिधी |
इस्लाम धर्मात शेवटचा महिना म्हणजे जुल हिज्जा होय. या महिन्यात जगभरातील करोडो मुस्लिम समाज बांधव व भगिनी सौदी अरेबिया येथील मक्का मदिना या पवित्र भूमीत हज यात्रे साठी रवाना होतात. महिन्याच्या नव्या दिवशी येथील अराफात मैदानातील विधी पूर्ण झाल्यानंतर दुसऱ्या दिवशी जगभरात बकरी ईद साजरी करण्याची प्रथा आहे. या अनुषंगाने रोहे तालुक्यासहित संपूर्ण रायगड जिल्ह्यातील मुस्लिम समाज बांधवांनी बकरी ईद मोठ्या उत्साहात, शांततेत आणि पारंपारिक पद्धतीने साजरी केली.
बुधवारी एकदिवसीय उपवास केल्यानंतर गुरुवारी पहाटे ईदची सामुदायिक नमाज अदा करण्यात आली. त्यानंतर मौलवी यांनी खूतबा पठण केल्यानंतर संपूर्ण भारतदेशात शांतता नांदावी. तसेच बंधूभाव व एकोपा कायम राहावे यासाठी सामूहिक प्रार्थना करण्यात आली. त्यानंतर एकमेकांना आलिंगन देत ईदच्या शुभेच्छा देण्यात आल्या.
ईदच्या पार्श्वभूमीवर सणाला गालबोट लागू नये म्हणून सर्वत्र मशिदी बाहेर कडेकोट पोलीस बंदोबस्त ठेवण्यात आले होते. ईदच्या अनुषंगाने पोलिस प्रशासना कडून काही नियम लागू करण्यात आले होते. न्हावे, सूडकोली, खैरे खुर्द, चांडगाव, कोलाड, नागोठणे आदी ठिकाणी असलेल्या मशिदीत सामूहिक नमाज अदा करून ईद साजरी करण्यात आली.
यंदा सौदी अरेबिया येथील मक्का मदिना येथे हजसाठी देशभरातून दीड लाखहून अधिक भाविक गेले आहे. मागील दोन महिन्यापासून इराण विरूद्ध अमेरिका या दोन देशांमध्ये युद्ध पेटला आहे.या युद्धामुळे विमान सेवा काही काळ खंडित करण्यात आली आहे. अशा परिस्थितीत केंद्र सरकारने विमानसेवा सुरळीत ठेवल्याने हज यात्रेकडू यांनी केंद्र सरकारचे आभार मानले आहेत.
माणगाव तालुक्यात बकरी ईद उत्साहात साजरी
माणगाव तालुक्यात गुरुवारी ईद – उल – अजहा म्हणजेच बकरी ईद सर्वत्र उत्साहात साजरी करण्यात आली. बकरी ईदची सामुदायिक नमाज अदा केल्यावर मुस्लिम बांधवानी एकमेकांना गळाभेट आलिंगन देत बकरी ईदच्या शुभेच्छा दिल्या. तसेच हिंदू बांधवांनीही मुस्लिम बांधवांची घरोघरी भेट घेऊन तसेच दूरध्वनीवरून बकरी ईदच्या शुभेच्छा दिल्या. या बकरी ईदनिमित्त तालुक्यात सर्वत्र चोख पोलीस बंदोबस्त ठेवण्यात आला होता.
माणगाव तालुक्यातील जुने माणगाव मस्जिद मोहल्ला, बाजारटेप मोहल्ला, नाणोरे, लोणशी मोर्बा, निजामपूर, दहिवली, दहिवली कोंड, तारणा, वडवली, साई, मांजरवणे, गोरेगाव, टेमपाले, लाखपाले, वणी, पुरार, हारकोळ आदी मुस्लिम वस्ती मोठी असलेल्या या सर्व गावांतून बकरी ईद उत्साहात साजरी करण्यात आली.
जुने माणगाव मस्जिद मोहल्ला येथील जाम मशिदीत हजारो मुस्लिम बांधवांनी गुरुवारी सकाळी बकरी ईदची सामुदायिक नमाज अदा केली. यावेळी मौलाना हाजीमिया जामदार यांनी कुराणाचे वाचन करून उपस्थित मुस्लिम बांधवाना बकरी ईदचे महत्व सांगितले.
या बकरी ईदनिमित्त अनेक मुस्लिम बांधवांनी अल्लाहच्या नावाने बोकडाच्या कुर्बानी दिल्या. राजिपचे माजी सभापती ॲड.राजीव साबळे, नगराध्यक्ष शर्मिला सुर्वे, रायगड जिल्हा राष्ट्रवादी काँग्रेसचे कार्याध्यक्ष सुभाष केकाणे, माजी नगराध्यक्ष ज्ञानदेव पवार, माजी नगराध्यक्ष आनंद यादव, संगीता बक्कम, उपनगराध्यक्ष रिया उभारे, नितीन बामगुडे, सुधीर पवार, बाबुराव निंबाळकर, डॉ.अजय मेहता, माजी उपनगराध्यक्ष राजेश मेहता, रत्नाकर उभारे, संदीप खरंगटे, दिलीप जाधव, नगरसेवक दिनेश रातवडकर, पाणीपुरवठा सभापती अजित तारलेकर, माजी नगरसेवक सिराज परदेशी, अकबर परदेशी, चँरीझेन फाउंडेशनचे अध्यक्ष कॅप्टन निर्मलसिंग रंधावा, किशोर झेमसे, राकेश पडवळ, उद्योजक अरुण क्षिरसागर, शंकर शिंदे , सामाजिक कार्यकर्ते संजय आण्णा साबळे, रवींद्र भिकु मोरे, निलेश थोरे, नितीन दसवते, प्रसाद धारिया, भालचंद्र खाडे, प्रवीण बागवे, जेष्ठ पत्रकार अरुण पवार, राकेश जाधव, एकता ग्रामीण क्रिकेट असोसिएशन माणगाव संस्थापक राहुल दसवते, सचिन गोरेगावकर, मंगेश पाटील, रामदास पवार, नयन दसवते, माणगाव पतसंस्थेचे व्यवस्थापक पुंडलिक गायकवाड यांच्यासह नगरसेवक, नगरसेविका, विविध क्षेत्रातील मान्यवर मंडळी, कार्यकर्ते यांनी नमाज झाल्यावर मशीद ठिकाणी व घरोघरी जाऊन मुस्लिम बांधवांची भेट घेऊन त्यांना ईदच्या शुभेच्छा दिल्या. तसेच अनेक हिंदू बांधवानी प्रत्यक्षात भेटून व दूरध्वनीवरून मुस्लिम बांधवाना शुभेच्छा दिल्या.
बकरी ईदनिमित्त पोलीस बंदोबस्त
बकरी ईद सण शांततेत आणि उत्साहात पार पडावा तसेच कोणताही अनुचित प्रकार घडू नये यासाठी पनवेल शहरातील मुस्लिम नाका परिसरात पोलिसांकडून विशेष बंदोबस्त ठेवण्यात आला होता. परिसरात पोलीस अधिकारी आणि कर्मचारी मोठ्या संख्येने तैनात करण्यात आले होते.
सणाच्या पार्श्वभूमीवर नागरिकांमध्ये सुरक्षिततेची भावना निर्माण व्हावी यासाठी पोलिस प्रशासन सतर्क होते. यावेळी डीसीपी यांनी स्वतः मुस्लिम नाका परिसराला भेट देत बंदोबस्ताची पाहणी केली. संबंधित अधिकाऱ्यांना आवश्यक सूचना देत कायदा व सुव्यवस्था अबाधित राखण्याचे निर्देशही त्यांनी दिले.
नागरिकांनीही पोलीस प्रशासनाला सहकार्य करीत बकरी ईद सण शांतता आणि आनंदात साजरा केला.
म्हसळ्यात बकरी ईद उत्साहात
मुस्लिम बांधवांचा पवित्र सण बकरी ईद म्हसळा तालुक्यात सर्वत्र आनंदी आणि उत्साही वातावरणात साजरी करण्यात आली. सर्व मुस्लिम बांधव म्हसळा बाजारपेठेतील मुख्य मशिदीत एकत्र येऊन ईदगाह येथे ईदची नमाज अदा करून एकमेकांच्या गळेभेट करून ईदचा आनंद साजरा केला जातो.
कुटुंबातील व्यक्तीच्या नावाने बकरी ईद निमित्त बोकडाची कुर्बानी देण्याची प्रथा म्हणजेच प्रत्येकजण कुर्बानी देणे हे आपले कर्तव्य व जबाबदारी जमजतो. तीन दिवस हा कुर्बानी देण्याचा कार्यक्रम सुरु असतो, या कुर्बानीच्या माध्यमातून आपापसात जवळीक साधली जाते. ईदचा पहिला दिवस मुख्य दिवस तर दुसरा दिवस बाशी ईद आणि तिसरा दिवस खुशी ईद म्हणून साजरा केला जातो.