पोटलज प्रीमियर लीगचा बल्लाळेश्‍वर वॉरियर्स मानकरी

। पाली/गोमाशी । वार्ताहर ।
जागसुददेव क्रीडा मंडळ पोटलज खुर्द यांच्यावतीने हनुमान जयंती निमित्त पोटलज प्रीमियर लीग अंडर आर्म क्रिकेट स्पर्धा पर्व 2चे आयोजन रविवारी (दि.16) केले होते. या प्रीमियर लीगमध्ये पोटलज खुर्द मधील आठ संघमालकांचे आठ संघ सहभागी झाले होते. अंडरआर्म क्रिकेट स्पर्धेचे आयोजन केल्यामुळे गावातील नवोदित खेळाडूंना खेळण्याची संधी मिळाली तसेच मुंबई, पुणे, ठाणे येथून हनुमान जयंतीसाठी आलेल्या क्रिडाप्रेमींनी मोठ्या प्रमाणावर गर्दी केली होती. या लीगचा अंतिम सामना संघ मालक राम हुले यांच्या बल्लाळेश्‍वर वॉरियर्स आणि प्रकाश भोईर यांच्या प्रभो फायर फायटर्स या दोन संघात झाला. या लीगचा प्रथम क्रमांकाचा मानकरी बल्लाळेश्‍वर वॉरियर्स तर उपविजेता प्रभो फायर फायटर्स हा संघ ठरला. प्रथम मानकरी संघास 3 हजार 333 रूपये व आकर्षक चषक तर द्वितीय संघास 2 हजार 222 रूपये व आकर्षक चषक, तृतीय क्रमांक संतोष हुले यांच्या माऊली वॉरियर्स यांच्या संघास 1 हजार 111 व आकर्षक चषक तर चतुर्थ क्रमांक यशवंत कदम यांच्या पाटील सुपर किंग या संघास 1 हजार 111 रूपये देवुन गौरविण्यात आले. या स्पर्धेतील मालिकावीर रोहित हुले तर उत्कृष्ट फलंदाज संतोष शेडगे आणि उत्कृष्ट गोलंदाज अशोक हुले, उत्कृष्ट क्षेत्ररक्षक प्रवीण हुले यांना आकर्षक चषक देऊन गौरविण्यात आले.