तटकरेंनी ‌‘धैर्य’ खचवलं

भाजपाला करावा लागणार तटकरेंचा प्रचार

| रायगड | आविष्कार देसाई |

जिल्ह्यातील भाजपामधून उमेदवारीला होणारा विरोध अखेर सुनील तटकरेंनी भाजपाच्याच वरिष्ठांना हाताशी घेत हाणून पाडला आहे. ‌‘साप भी मर गया और लाठीभी नही तुटी’, असेच काहीसे घडले आहे. त्यामुळे धैर्यशील पाटील यांची चांगलीच अडचण झाली असून, त्यांना तोंड दाबून बुक्क्यांचा मार खावा लागत असल्याचे चित्र आहे.

लोकसभा मतदारसंघातून राष्ट्रवादी काँग्रेस अजित पवार गटाचे सुनील तटकरे यांच्या नावावर शनिवारी भाजपाच्या प्रमुख नेत्यांच्या उपस्थित शिक्कामोर्तब झाले. यावेळी भाजपाचे इच्छुक उमेदवार धैर्यशील पाटीलदेखील उपस्थित होते. भाजपामधील सर्व पदाधिकारी आणि कार्यकर्त्यांनीदेखील युती धर्म पाळण्याचे मान्य केल्याचे भाजपा पेणचे आमदार रवींद्र पाटील यांनी ‌‘कृषीवल’शी बोलताना स्पष्ट केले. धैर्यशील पाटील यांनीदेखील आता तटकरेंच्या प्रचारासाठी मैदानात उतरावे, असे आदेश भाजपाचे प्रदेशाध्यक्ष चंद्रशेखर बावणकुळे यांच्यासह मंत्री रवींद्र चव्हाण यांनी दिले आहेत. भाजपाच्या या पवित्र्यामुळे धैर्यशील पाटील यांना मात्र चांगलेच तोंडावर आपटण्यास भाग पडले आहे. गेल्या काही दिवसांपासून महायुतीतून रायगड लोकसभेची जागा कोण लढवणार याबाबत संभ्रम निर्माण झाला होता. अजित पवार यांनी सर्वप्रथम सुनील तटकरे यांची उमेदवारी जाहीर केल्याने भाजपाच्या गोटात चांगलाच हादरा बसला होता. तटकरेंची उमेदवारी घोषित झाली असली, तरी अद्याप त्यांनी उमेदवारी अर्ज दाखल केला नाही, असे सांगत भाजपाने तटकरेंपुढे आव्हान कायम ठेवले होते. अखेर हा वाद शनिवारी मुंबई येथे सोडवण्यात आला.

या बैठकीला चंद्रशेखर बावणकुळे, सुनील तटकरे, मंत्री रवींद्र चव्हाण, आमदार रवींद्र पाटील, रायगड लोकसभा अध्यक्ष सतीश धारप यांच्यासह रायगड जिल्ह्यातील भाजपाचे पदाधिकारी उपस्थित होते. मोदींना पुन्हा प्रधानमंत्रीपदी बसवण्यासाठी सर्वांनी एकत्रित काम करणे गरजेचे असल्याचे बैठकीत सांगण्यात आले. यासाठी महायुतीचा धर्म म्हणून तटकरेंना निवडून आणण्यासाठी सर्वांनी मदत करावी, असे आवाहन बावणकुळे यांनी केले. मात्र, तटकरे यांनीदेखील आगामी काळात होणाऱ्या विधानसभेच्या निवडणुकीत भाजपाच्या उमेदवारांना मदत करावी, अशी अट काही पदाधिकाऱ्यांनी घातली. त्याला तटकरे यांनी होकार दिल्याचे सूत्रांनी सांगितले.

धैर्यशील पाटलांची पंचाईत
तटकरेंना निवडून आणण्यासाठी धैर्यशील पाटील यांनादेखील मदत करावी लागणार आहे. धैर्यशील पाटील यांना रायगड लोकसभेची उमेदवारी देण्यात येणार असल्याच्या बोलीवर ते भाजपात गेले होते. मात्र, त्यांना उमेदवारी मिळाली नाही. सूत्रांनी दिलेल्या माहितीनुसार, धैर्यशील पाटील यांना पुढील कालावधीत राज्यसभेवर घेण्याची तयारी भाजपाने केली आहे. एकूणच काय तर, भाजपाने पाटील यांची चांगलीच पंचाईत करुन ठेवल्याचे चित्र आहे.

महायुतीमधील मतभेद दूर
रायगड लोकसभेच्या जागेवरुन महायुतीमध्ये असणारे मतभेद आता दूर झाले आहेत. भाजपाची सर्वच मंडळी धैर्यशील पाटील यांच्यासह माझ्या प्रचाराला सुरुवात करतील, असे सुनील तटकरे यांनी सांगितले.