उलवेमध्ये पेट्रोलचा काळाबाजार

प्रशासनाचे दुर्लक्ष, नागरिक संतप्त

| नवी मुंबई | प्रतिनिधी |

उलवे हा परिसर प्रशासकीयदृष्ट्या रायगड जिल्ह्यात येतो. येथे एकही अधिकृत पेट्रोल पंप नसल्याचा फायदा घेत काही ठिकाणी अवैध पेट्रोल विक्रीचे मोठे रॅकेट निर्भयपणे सुरू असल्याचे समोर आले आहे. वाहनचालकांकडून प्रतिलीटर 30 ते 35 रुपये अधिक आकारले जात असून, पेट्रोलचे दर काही ठिकाणी तब्बल 135 ते 140 रुपये लीटरपर्यंत पोहोचल्याची चर्चा आहे.

स्थानिकांच्या म्हणण्यानुसार, गल्लीबोळातील दुकाने, गॅरेज आणि घरांमध्ये पेट्रोल ड्रम, कॅन आणि बाटल्यांमध्ये साठवून खुलेआम विकले जाते. अधिकृत दरापेक्षा मोठ्या फरकाने वाढवलेले हे दर नागरिकांना लुटण्यासारखे असल्याची भावना व्यक्त होत आहे. अधिकाऱ्यांच्या ‌‘बंद पाकिटां’मुळे धंदा वाढतोय, अशी जनतेत खुलेआम जोरदार चर्चा होत आहे. गृहखात्याचे प्रमुख मुख्यमंत्री देवेंद्र फडणवीस असताना, त्यांच्या अखत्यारीतील काही कामचुकार वरिष्ठ अधिकारी व कर्मचाऱ्यांच्या आशीर्वादामुळे हा अवैध धंदे उद्योग सुरू राहतो, अशी चर्चा उलवे व रायगड परिसरात वाढत चालला आहे.

नागरिकांनी प्रशासन आणि पोलीस यांना वारंवार तक्रारी दिल्यानंतरही ठोस कारवाई न झाल्याने स्थानिकांमध्ये संताप निर्माण झाला आहे. अनेकांच्या मते, काहींच्या पाठबळामुळेच हा धंदा निर्भयपणे सुरू आहे. अलीकडेच उलवेत झालेल्या आगीत दुकानात अवैध पेट्रोल आणि सिलिंडरचा साठा असल्याचे तपासात उघड झाले होते. त्यामुळे हे रॅकेट सुरू राहिले तर भविष्यात आणखी मोठी दुर्घटना घडू शकते, असा इशारा अग्निशमन अधिकाऱ्यांनीही दिला आहे. या पार्श्वभूमीवर नागरिकांनी रायगड जिल्हा पोलीस अधीक्षक अचल दलाल यांनी तातडीने हस्तक्षेप करून या अवैध पेट्रोल विक्रीवर कडक कारवाई करावी, अशी जोरदार मागणी केली आहे. उलवे परिसरातील सुरक्षितता आणि कायदा-सुव्यवस्था अबाधित ठेवणे आवश्यक असल्याचे नागरिकांचे म्हणणे आहे.