लॉर्ड्स कसोटीत गोलंदाजांचा कहर

| लॉर्ड्स | वृत्तसंस्था |

इंग्लंड आणि न्यूझीलंड यांच्यात तीन सामन्यांची कसोटी मालिका खेळवली जात आहे. या मालिकेतील पहिला सामना लॉर्ड्सच्या मैदानावर खेळवला जात आहे. लॉर्ड्स कसोटी सामन्याच्या पहिल्याच दिवशी गोलंदाजांचा दबदबा पाहायला मिळाला. पहिल्या दिवशी दोन्ही संघांच्या एकूण 16 विकेट्स पडल्या आहेत आणि फलंदाजांना धावा काढण्यासाठी अक्षरश: संघर्ष करताना दिसले. दरम्यान काईल जेमिसनने 5 विकेट्स आणि ऑली रॉबिन्सनने तीन विकेट मेडन षटक टाकलं.

न्यूझीलंडचा संघ सध्या इंग्लंड दौऱ्यावर असून पहिल्याच सारन्यात लॉर्ड्सच्या खेळपट्टीने दोन्ही संघांच्या फलंदाजांसाठी कर्दनकाळ ठरलं. असमान उसळी असलेल्या खेळपट्टीवर पहिल्याच दिवशी तब्बल 16 विकेट्स पडल्या. ढगाळ वातावरणामुळे वेगवान गोलंदाजांना हवेत आणि खेळपट्टीवरूनही भरपूर मदत मिळत होती, त्यामुळे फलंदाजांसाठी मात्र मोठं आव्हान होतं.

नाणेफेक जिंकून न्यूझीलंड क्रिकेट संघाने प्रथम गोलंदाजीचा योग्य निर्णय घेतला आणि त्यांच्या वेगवान गोलंदाजांनी सुरुवातीपासूनच वर्चस्व गाजवलं. सीमर्सना मिळालेल्या अनुकूल परिस्थितीचा पुरेपूर फायदा घेत त्यांनी चेंडूने विकेट्सची रांग लावली आणि प्रतिस्पर्धी फलंदाजांना सतत अडचणीत टाकलं. किवी संघाच्या चार वेगवान गोलंदाजांनी इंग्लंडच्या फलंदाजीला खिंडार पाडलं. विशेषतः काईल जेमिसनने खेळपट्टीच्या अतिरिक्त उसळीचा आणि सीमचा पुरेपूर फायदा घेतला. इंग्लंडची आक्रमक बॅझबॉल फलंदाजी अयशस्वी ठरली आणि संघाने पहिल्या 10 षटकांत केवळ 24 धावा केल्या.

बेन डकेट (19), जेकब बेथेल (6) आणि जो रूट (1) झटपट बाद झाले, त्यामुळे इंग्लंडची धावसंख्या 4 गडी बाद 33 झाली. पावसामुळे डावात व्यत्यय आला आणि यादरम्यान न्यूझीलंडचा वेगवान गोलंदाज मॅट हेन्रीला पाठीच्या दुखापतीमुळे बाहेर पडावं लागलं, परंतु किवी गोलंदाजांनी आपलं वर्चस्व कायम ठेवलं. इंग्लंडकडून पुन्हा एकदा हॅरी ब्रुकने संघाचा डाव सावरला. ब्रुकने एका टोकाकडून विकेट्स पडत असताना आपली आक्रमक फलंदाजी कायम ठेवली. रचिन रवींद्र व डेव्हॉन कॉन्वे यांच्यामुळे ब्रुकला दोन वेळा जीवदान मिळालं. ब्रुकने 10 चौकारांच्या मदतीने 56 धावांची खेळी केली. ब्रुक बाद झाल्यानंतर इंग्लंडचा डाव 140 धावांवर आटोपला. न्यूझीलंडच्या काईल जेमिसनने 64 धावा देत 5 विकेट्स घेतल्या. त्याने कारकिर्दीत सहाव्यांदा 5 विकेट्स घेण्याचा पराक्रम केला. तर नॅथन स्मिथने 3 विकेट्स घेतल्या.

140 धावांचा पाठलाग करताना न्यूझीलंडची सुरुवात अत्यंत निराशाजनक झाली. कसोटी क्रिकेटमध्ये पुनरागमनाचा आनंद साजरा करणाऱ्या इंग्लंडचा वेगवान गोलंदाज ऑली रॉबिन्सनने आपल्या पहिल्याच षटकात तीन बळी घेत किवींच्या आघाडीच्या फळीला उद्ध्वस्त केलं. रॉबिन्सनने सर्वप्रथम डेव्हॉन कॉन्वेला (1) पायचीत केलं. त्यानंतर त्याने अनुभवी फलंदाज केन विल्यमसनला (0) शॉर्ट लेगला झेलबाद केलं. पुढच्याच चेंडूवर त्याने रचिन रवींद्रला शून्यावर बाद करून न्यूझीलंडचं कंबरडं मोडलं.

त्यानंतर गस ॲटकिन्सनने कर्णधार टॉम लॅथमला (3) बाद केलं आणि रॉबिन्सनने डॅरिल मिचेलला बाद करत चौथी विकेट पटकावली. जोश टंगने टॉम ब्लंडेलला बाद करून आपली 50वी कसोटी विकेट पूर्ण केली. एके वेळी न्यूझीलंडची धावसंख्या 29 धावांवर 6 गडी बाद अशी होती, परंतु दिवसाचा खेळ संपेपर्यंत त्यांनी 61 धावा केल्या होत्या. पण, किवी संघ अजूनही इंग्लंडपेक्षा 79 धावांनी मागे आहे. दुसऱ्या दिवसाची सुरुवात ग्लेन फिलिप्स आणि नॅथन स्मिथ यांच्या फलंदाजीने होईल, जे अनुक्रमे 31 आणि 6 धावांवर नाबाद खेळत आहेत.