पनवेलमधील बिल्डरला तरुणीने लुटले!

पनवेल | वार्ताहर |
पनवेल येथील एका तरुण बांधकाम व्यावसायिकाला सोशल मीडियावर एका तरुणीशी झालेली ओळख चांगलीच अंगलट आली असून, हनी ट्रॅपमध्ये अडकलेल्या या व्यावसायिकाला लाखो रुपये गमवावे लागले आहेत.
याप्रकरणी गुन्हा दाखल झाल्यानंतर कोंढवा पोलिसांनी तरुणीसह सहा जणांच्या टोळीला अटक करत बेड्या ठोकल्या आहेत. यात रवींद्र भगवान बदर (26), सचिन भातुलकर, आण्णा साळुंके (40), अमोल ढवळे (32), मंथन शिवाजी पवार (24) आणि 19 वर्षीय तरुणी यांचा समावेश आहे. विशेष म्हणजे, कोंढवा पोलिसांनी अटक केलेली तरूणी ही केवळ नववी पास आहे. मात्र, असे असले तरी सोशल मीडियाचा वापर करण्यात सदरची तरुणी चांगलीच पटाईत असल्याचे पोलीस तपासातून निष्पन्न झाले आहे. तिचा पती खूनाच्या गुन्ह्यात कारागृहात शिक्षा भोगतोय. पती कारागृहात गेल्यावर पतीच्या गुन्हेगार मित्रासोबत तिची ओळख झाली अन् यातूनच हनी ट्रॅप करणार्‍या नव्या टोळीचा उदय होऊन तीही या टोळीची सदस्य बनली. यात पुढे अनेकजण या टोळीचे सावजसुद्धा झाले. कोणी अब्रूला घाबरुन तर कोणी भीतीपोटी त्यांना पैसे देत पोलिसात जाण्याचे टाळले. मात्र, चार दिवसांपूर्वी मुंबईच्या एका व्यावसायिकाने पोलिसात जाण्याचे धाडस केले अन् अवघ्या 72 तासांच्या आत पोलीस उपनिरीक्षक प्रभाकर कापुरे आणि त्यांच्या पथकाने हनीट्रॅप करणारी ही टोळी गजाआड केली. या टोळीने पनवेल येथील 31 वर्षीय व्यावसायिकाला मारहाण करत खंडणी उकळली होती. या घटनेनंतर व्यावसायिकाने पोलिसात धाव घेतल्यानंतर पोलिसांनी तपास करून या टोळीला जेरबंद केले.