स्थानिक तरुणांवर जीवघेणा हल्ला
| चिरनेर | वार्ताहर |
भाजी विक्री करणाऱ्या चिरनेर गावातील स्थानिक तरुणांवर परप्रांतीय भाजी विक्रेत्यांनी जीवघेणा हल्ला केल्याची घटना शुक्रवारी रात्री ठिक 8.45 च्या सुमारास घडली आहे. या घटनेची माहिती मिळताच चिरनेर गावातील ग्रामस्थांनी एकजुटीने सदर घटनेकडे धाव घेतली असता परप्रांतीय भाजी विक्रेत्यांनी त्या ठिकाणावरुन पोबारा केला आहे. या घटनेसंदर्भात उरण पोलीस ठाण्यात तक्रार दाखल करण्यात आली आहे.
सविस्तर माहिती अशी की, चिरनेर येथील सुभाष जोमा ठाकूर हे आपल्या कुटुंबाच्या उदरनिर्वाहासाठी भाजीपाला विक्रीचा व्यवसाय गेली अनेक वर्षे चिरनेर गावात करत आहेत. त्यांच्या या व्यवसायाला त्याची पत्नी सविता ठाकूर, सुजित व रिक्षाचालक सुशांत ठाकूर ही दोन मुले सहकार्य करत आहेत. स्थानिकांच्या भाजीपाल्याच्या व्यवसायाच्या बाजूला परप्रांतीय नागरीक ही भाजीचा व्यवसाय करत आहेत. शुक्रवारी (दि.28) रात्री ठिक 9 वा.च्या सुमारास सुशांत हा नेहमीप्रमाणे आपल्या आईवडिलांना सहकार्य म्हणून भाजीचे दुकान बंद करण्यासाठी गेला असता मेहताब अली अबुल कलाम अली उर्फ संजय हा परप्रांतीय भाजी विक्रेता इसम सुशांतच्या अंगावर थुंकला. या घटनेचा जाब सुशांतने त्या इसमाला विचारला असता दोघांमध्ये शाब्दिक बाचाबाची झाली.
मेहताब अली अबुल कलाम अली उर्फ संजय यांनी सदर घटनेची खबर आपल्या सहकाऱ्यांना दिली. त्याच दरम्यान सुशांत आपले दुकान बंद करत असताना मेहताब अली अबुल कलाम अली उर्फ संजय व त्यांचे सहकारी यांनी अवजड भाजी ठेवण्याचा ट्रे सुशांतच्या डोक्यात जीवे ठार मारण्याच्या उद्देशाने घातला व त्याला लाथाबुक्क्यांनी मारझोड केली. आपल्या भावाला परप्रांतीय इसम मारत असल्याची बाब सुजित यांच्या निदर्शनास येताच तो भावाला सोडविण्यासाठी पुढे सरसावला असता, मेहताब अली अबुल कलाम अली उर्फ संजय व त्यांच्या सहकाऱ्यांनी सुजित ठाकूर यांच्या डोक्यात भाजी ठेवण्याचा ट्रे घालण्याचा प्रयत्न केला. या झटापटीत सुशांत व सुजित यांच्या डोक्याला, हाताला गंभीर स्वरूपाची दुखापत झाली आहे. सदर घटनेची माहिती चिरनेर गावातील ग्रामस्थांना मिळताच ग्रामस्थांनी एकजुटीने सदर घटनेकडे धाव घेतली असता परप्रांतीय भाजी विक्रेत्यांनी त्या ठिकाणावरुन पोबारा केला. या घटने संदर्भात उरण पोलिस ठाण्यात तक्रार दाखल करण्यात आली असून, पोलिसांनी ग्रामस्थांना शांत राहण्याचे आवाहन केले आहे. सदर परप्रांतीय भाजी विक्रेते हे बांगलादेशीय असून, उत्तर प्रदेश राज्यातील मूळ रहिवासी असल्याचे बोगस आधारकार्ड त्यांच्याकडे असल्याचे निदर्शनास येत असून, उरण पोलिसांनी याबाबत अधिक माहिती घेऊन संबंधितांवर योग्य ती कारवाई करण्याची मागणी चिरनेरवासियांनी केली आहे.