नवीन पनवेलमध्ये घरफोडी

| पनवेल | वार्ताहर |

नवीन पनवेल अग्निशमन कॉलनीत चोरी झाल्याची घटना घडली आहे झाली असून, चोरट्यांनी बंद घराचे कुलूप तोडून दागिने पळवून नेले. चोरी करण्यापूर्वी शेजारील सर्व घराला बाहेरून कडी लावण्यात आली होती.

अग्निशमन दलाच्या इमारतीत राहणारे फायरमन जितेंद्र पाटील यांच्या घराचा दरवाजा चोरट्यांनी तोडण्याचा प्रयत्न केला. आवाजामुळे जागे झालेल्या पाटील यांनी बाहेर येऊन पाहताच चोरट्याने तेथून पळ काढला. त्यांनी इमारतीखाली येऊन सुरक्षारक्षकाला विचारले. पण त्याने चोरट्यांना पाहिले नव्हते. तेवढ्यात इमारतीमधील इतर सहकाऱ्यांचे त्यांच्या मोबाइलवर फोन येण्यास सुरुवात झाली. कोणीतरी बाहेरून दरवाजाला कडी लावली असल्याचे सांगितले. पाटील यांनी सर्व दरवाजांची कडी उघडून सहकाऱ्यांना बाहेर घेतले. तळमजल्यावरील राजेंद्र फरांदे हे कामानिमित्त गावी सातारा येथे गेले असून त्यांच्या दरवाजाचे कुलूप तोडल्याचे दिसले. चोरट्यांनी सोन्याचे मंगळसूत्र, फुलांची जोडी आणि 18 हजार रुपये असा 70 हजार रुपयांचा ऐवज चोरला आहे.