विद्यार्थ्यांसाठी करिअर मार्गदर्शन शिबीर

। पोलादपूर । प्रतिनिधी ।

आकार प्रतिष्ठानतर्फे पोलादपूर तालुक्यातील विद्यार्थ्यांसाठी करिअर मार्गदर्शन शिबिराचे आयोजन पोलादपूर येथील कॅप्टन विक्रमराव मोरे सभागृहामध्ये करण्यात आले होते. यावेळी तालुक्यातील असंख्य विद्यार्थ्यांचा या शिबिरास उत्स्फूर्त प्रतिसाद लाभला. या शिबिराचे उद्घाटन महाड येथील ज्येष्ठ साहित्यिक सुधीर शेठ यांच्या हस्ते करण्यात आले.

पोलादपूर तालुक्यातील माध्यमिक आणि उच्च माध्यमिक प्रशालांच्या इयत्ता दहावी आणि बारावीच्या विद्यार्थ्यांसाठी विवेक मेहेत्रे यांचा ‘चला यशस्वी होऊ या’ कार्यक्रम आयोजित करण्यात आला होता. यावेळी संगणकाद्वारे प्रोजेक्टरवरून मोठ्या पडद्यावर व्हिडीओ क्लिप्स आणि पॉवरपॉईट प्रोजेक्टद्वारे विद्यार्थ्यांमध्ये अभ्यास व शैक्षणिक तसेच जीवनातील यशासाठी प्रोत्साहनपर मार्गदर्शन विवेक मेहेत्रे यांनी केले. याप्रसंगी सेंट्रल बँक ऑफ इंडियाचे सेवानिवृत्त महाप्रबंधक सुनील चव्हाण यांचेही विद्यार्थ्यांसाठी बँकेच्या विविध शैक्षणिक कर्जांबाबत मार्गदर्शन केले.