जिल्हा रुग्णालयातील सिलींग फॅन पडला

सुदैवाने उपचार सुरु असलेला रुग्ण बचावला

। अलिबाग । प्रतिनिधी ।

अलिबाग जिल्हा रुग्णालयातील दुसऱ्या मजल्यावरील वार्डमध्ये सिलींग फॅन खाली कोसळला. यादरम्यान, उपचार सुरू असलेला रुग्ण सुदैवाने बचावला. ही घटना सोमवारी दुपारी घडली. रुग्णालयात रविवारी पडलेल्या स्लॅबची दुरुस्ती करीत असताना गंज लागलेल्या सळईसहित फॅन पडला असून कोणालाही दुखापत झाली नसल्याची माहिती रुग्ण प्रशासनाने दिली आहे.

अलिबाग जिल्हा रुग्णालयाच्या दुरुस्तीसाठी सार्वजनिक बांधकाम विभागाने करोडो रुपये खर्च केले. प्लास्टर रंगरंगोटी पीओपीची कामे करून सुमारे पाच कोटीहून अधिक खर्च करण्यात आला. मात्र, खर्च करूनही स्लॅब कोसळणे, गंज लागलेल्या सळई दिसणे असे अनेक प्रकार आढळून येत आहेत. मागील महिन्याभरापूर्वी डायलेसीस सेंटर जवळच स्लॅब पडला होता. या घटनेनंतर रविवारी दुपारी दुसऱ्या मजल्यावरील मेल मेडीकल वार्ड मधील स्लॅब कोसळला. या घटनेनंतर रुग्ण प्रशासनाने बांधकाम विभागाच्या अधिकाऱ्यांना बोलावून तातडीने दुरुस्ती करण्यास सांगितले. सोमवारी सकाळी बांधकाम विभागातील दुरुस्तीचे काम करणारे कामगार आले. दुरुस्तीचे काम सुरू केले. कोसळलेल्या स्लॅबचा भाग काढून त्या ठिकाणी नवीन स्लॅब टाकण्याचा प्रयत्न केला. दरम्यान, गंज लागलेल्या सळईवरील सिलींग फॅन खाली कोसळला. सुदैवाने तो फॅन उपचार सुरू असलेल्या रुग्णाच्या बाजूला मोकळ्या जागेत पडला. त्यामुळे सुदैवाने जिवीतहानी टळली. कोणालाही दुखापत झाली नाही.