मंडळांना भेटी देत घेतला आशीर्वाद
| अलिबाग | प्रतिनिधी |
साखरचौथ गणेशोत्सवानिमित्त शेतकरी कामगार पक्षाच्या राज्य प्रवक्त्या तथा महाराष्ट्र राज्य मीडिया सेलच्या अध्यक्षा चित्रलेखा पाटील यांनी अलिबाग विधानसभा मतदारसंघातील विविध सार्वजनिक गणेशोत्सव मंडळांना भेटी देत साखरचौथीच्या गणरायाचे मनोभावे दर्शन घेतले. यावेळी त्यांनी गणरायाच्या चरणी सर्वांच्या सुख-समृद्धी, उत्तम आरोग्य आणि मंगलमय जीवनासाठी प्रार्थना केली.
गणेश चतुर्थीनंतर भाद्रपद वद्य चतुर्थीला विराजमान होणाऱ्या साखरचौथीच्या गणपतीला रायगडसह ठाणे, मुंबई, पालघर तसेच कोकण परिसरात विशेष धार्मिक आणि सांस्कृतिक महत्त्व आहे. साखरचौथीच्या निमित्ताने मतदारसंघातील विविध गावांमध्ये आणि परिसरात सार्वजनिक गणेशोत्सव मंडळांनी आकर्षक सजावट व धार्मिक कार्यक्रमांचे आयोजन केले होते. दरम्यान, साखरचौथीच्या गणरायाच्या दर्शनासाठी भाविक मोठ्या श्रद्धेने सार्वजनिक मंडळांना भेट देत असतात. या पारंपरिक उत्सवाच्या निमित्ताने मतदारसंघातील नागरिकांशी संवाद साधण्याची संधीही मिळत असल्याने चित्रलेखा पाटील यांनी यंदाही विविध गणेशोत्सव मंडळांना भेटी देण्याची परंपरा कायम ठेवली. त्यांच्या भेटीदरम्यान मंडळांचे पदाधिकारी, कार्यकर्ते आणि स्थानिक नागरिकांनी त्यांचे स्वागत केले. या भेटींमुळे गणेशोत्सवाचा उत्साह अधिक वाढल्याचे चित्र परिसरात पाहायला मिळाले. साखरचौथीच्या गणरायाच्या दर्शनासाठी चित्रलेखा पाटील यांनी घेतलेल्या या भेटींमुळे मतदारसंघातील नागरिक, गणेशोत्सव मंडळांचे पदाधिकारी आणि कार्यकर्त्यांशी त्यांचा संवाद साधला गेला. तसेच मंडळांच्या पदाधिकारी, कार्यकर्ते तसेच भाविकांशी त्यांनी संवाद साधून गणेशोत्सवाच्या शुभेच्छा दिल्या.
भेटीदरम्यान चित्रलेखा पाटील यांनी, गणेशोत्सवाच्या माध्यमातून सामाजिक एकोपा, बंधुभाव आणि सांस्कृतिक परंपरा अधिक दृढ होत असल्याचे नमूद केले. तसेच, साखरचौथीचा गणपती हा रायगड आणि कोकणच्या सांस्कृतिक परंपरेचा महत्त्वाचा भाग आहे. दरवर्षीप्रमाणे यंदाही मतदारसंघातील विविध सार्वजनिक गणेशोत्सव मंडळांना भेट देऊन गणरायाचे दर्शन घेण्याचा आणि नागरिकांच्या शुभेच्छा स्वीकारण्याचा आनंद मिळाला. विघ्नहर्त्या गणरायाच्या चरणी सर्वांच्या सुख-समृद्धी, उत्तम आरोग्य आणि मंगलमय जीवनासाठी प्रार्थना केली, अशी भावना चित्रलेखा पाटील यांनी व्यक्त केली. तसेच, सार्वजनिक गणेशोत्सव मंडळांच्या माध्यमातून विविध सामाजिक, सांस्कृतिक आणि धार्मिक उपक्रमांचे आयोजन केले जाते. या परंपरेला प्रोत्साहन देत नागरिकांनी उत्सव आनंदात, भक्तिभावाने आणि सामाजिक सलोखा जपत साजरा करावा, असे आवाहनही चित्रलेखा पाटील यांच्यामार्फत यावेळी करण्यात आले.