सिडको प्रशासनाने घेतली आंदोलनाची दखल
| पनवेल | प्रतिनिधी |
पनवेल तालुक्यातील जमिनीवर उभारलेल्या आंतरराष्ट्रीय विमानतळाला स्व. लोकनेते दि. बा. पाटील आंतरराष्ट्रीय विमानतळ असे नाव देण्यात यावे, या मागणीसाठी पनवेल तालुका पत्रकार एकत्रीकरण संस्थेच्यावतीने धरणे आंदोलनाचा इशारा दिला होत. मात्र, हे आंदोलन स्थगित करण्यासाठी बेलापूरचे वरिष्ठ पोलीस निरीक्षक अरुण पवार यांनी सिडको अधिकाऱ्यांशी समन्वय साधत पत्रकारांच्या या धरणे आंदोलनास सहकार्य करण्याची भावना व्यक्त केली. त्यानुसार गुरूवारी (दि.25) सिडकोच्या दक्षता विभागाचे अधिकारी गायकवाड यांच्यासोबत बैठक लावण्यात आली. यावेळी सुरेश मेंगडे यांनी उपस्थित शिष्टमंडळाला धरणे आंदोलन स्थगित करावे यासाठी शुक्रवारी (दि.26) दुपारी 12 वाजता विमानतळ प्राधिकरणचे सहव्यवस्थापक शंतनू गोयल यांच्यासोबत बैठक लावण्याचे आश्वासन दिले आहे.
सिडकोने विकसित केलेल्या आणि पनवेल तालुक्यातील जमिनीवर विकसित झालेल्या आंतरराष्ट्रीय विमानतळावरुन लवकरच विमानांचे उड्डाण होणार आहे. विमानतळाला दि. बा. पाटील यांचे नाव देण्यासाठी मागील तीन वर्षांत प्रकल्पग्रस्तांनी अनेक आंदोलने केली आहेत. विविध संघटना, राजकीय पक्ष विमानतळ नामांतरासाठी आंदोलन करीत असतात. हे सर्व नागरिकांच्या समोर आणण्याचे काम पत्रकार करीत आहेत. मात्र, पत्रकारांच्या देखील मागण्या त्यांना सविस्तरपणे मांडता याव्यात यासाठी पनवेल तालुक्यातील पत्रकार एकत्र येत पनवेल तालुका पत्रकार एकत्रीकरण संस्थेच्या बॅनरखाली विमानतळाला स्व. लोकनेते दि. बा. पाटील यांचे नाव देण्याच्या मागणीसाठी धरणे आंदोलन करण्याची तयारी दर्शविली आहे.
त्यानुसार या आंदोलनापूर्वीच बेलापूर सिबिडी पोलीस ठाण्याचे वरिष्ठ पोलीस निरीक्षक अरुण पवार यांच्या मार्गदर्शनाखाली गोपनीय विभागाचे अधिकारी चेतन अहिरे यांनी सिडको अधिकाऱ्यांशी समन्वय साधत सदरचे धरणे आंदोलन होण्यापूर्वीच तोडगा काढण्याचा प्रयत्न केला. यावेळी सिडको अधिकाऱ्यांनी देखील सहकार्याची भूमिका घेत आंदोलनापूर्वी सिडको भवन बेलापूर येथे विमानतळ प्राधिकरण सह व्यवस्थापक शंतनू गोयल यांच्यासोबत त्यांच्याच दालनात गुरूवारी (दि.26) दुपारी 12 वाजता बैठक लावण्याची भूमिका घेतली आहे. या बैठकीत स्व. लोकनेते दि. बा. पाटील यांचे नाव विमानतळाला देण्याबाबत योग्य आश्वासन मिळाले नाही तर त्याच क्षणी धरणे आंदोलनाचा मार्ग स्वीकारला जाईल, असेही पनवेल तालुका पत्रकार एकत्रीकरण संस्थेच्या शिष्टमंडळाने आयोजित करण्यात आलेल्या बैठकीत सांगितले.
सिडकोचे अधिकारी गायकवाड यांच्यासोबत गुरूवारी झालेल्या बैठकीसाठी पनवेल तालुका पत्रकार एकत्रीकरण संस्थेचे ज्येष्ठ पत्रकार विजय कडू, सय्यद अकबर, संजय कदम, केवल महाडिक, राज भंडारी, क्षितिज कडू, सुनील पाटील, चंद्रकांत शिर्के, असीम शेख, बेलापूरचे गोपनीय पोलीस अधिकारी चेतन अहिरे आदिंसह शिष्टमंडळ उपस्थित होते.