अलिबाग स्थानकाची स्वच्छता कागदावरच

सार्वजनिक स्वच्छतागृहासह परिसरात घाणीचे साम्राज्य

| रायगड | प्रमोद जाधव |

स्वच्छतेमध्ये तृतीय क्रमांक मिळवणाऱ्या अलिबाग एसटी बसस्थानकांची स्वच्छता कागदावर अशी परिस्थिती निर्माण झाली आहे. स्थानकाच्या परिसरात ठिकठिकाणी कचऱ्यासह गवताचे साम्राज्य निर्माण झाले आहे. स्वच्छतागृह बंद स्थितीत असून, त्या परिसरात दुर्गंधी निर्माण झाली आहे. त्यामुळे प्रवाशांच्या सुरक्षेचा प्रश्न ऐरणीवर आला आहे. स्वच्छतेसाठी नेमण्यात आलेल्या ठेकेदारांचे कामकाज संशयास्पद असल्याची चर्चा नागरिकांकडून व्यक्त केली जात आहे.

अलिबाग हे जिल्ह्याचे ठिकाण आहे. या जिल्ह्याच्या ठिकाणी एसटी महामंडळाचे आगार व स्थानक अलिबागमध्ये आहे. अलिबाग आगारात अडीचशेहून अधिक कर्मचारी आहेत. त्यामध्ये दीडशेहून अधिक चालक व वाहकांचा समावेश आहे. स्थानकात 68 एसटी बसेस असून, एसटीला महिन्यातून सुमारे पाच कोटी रुपयांचे उत्पन्न मिळते. अलिबाग तालुक्यासह अनेक भागातील हजारो प्रवासी एसटीतून प्रवास करतात. वेगवेगळ्या विभागातील जिल्हा व तालुका शासकीय कार्यालये, शाळा, महाविद्यालये आहेत. नोकरीबरोबरच शिक्षणासाठी अलिबागमध्ये येणाऱ्यांची संख्या मोठ्या प्रमाणात आहे. पर्यटकांची ओघही अलिबागमध्ये प्रचंड आहे. नियमित कामाला येणारे प्रवासी, पर्यटक, विद्यार्थी एसटी बसमधून प्रवास करणाऱ्यावर अधिक भर देतात.

प्रवाशांना चांगली सुविधा मिळावी, म्हणून स्थानकाच्या परिसरात सामाजिक बांधिलकीतून स्वच्छतागृह उभारले आहे. लाखो रुपये खर्च करून हे स्वच्छतागृह मागील काही वर्षांपूर्वी बांधले आहे. स्थानक स्वच्छ व सुंदर दिसावे यासाठी एसटी महामंडळाने एका खासगी कंपनीला ठेका दिला आहे. या कंपनीमार्फत अलिबाग स्थानकाची स्वच्छताराखली जाते. मात्र, स्थानकाच्या आवारातच ठिकठिकाणी कचऱ्याचे साम्राज्य आहे. स्थानकाच्या आवारात असलेल्या हिरकणी कक्षाच्या बाजूलाच कचऱ्याचा ढिगारा पडलेला असतो. स्थानकामधील स्वच्छतागृहाची अवस्था दयनीय झाली आहे. स्वच्छतागृहाच्या परिसराला गवत, झुडपांनी विळखा घातला आहे. स्वच्छतागृहातील अनेक साहित्य तुटलेल्या अवस्थेत आहेत. स्वच्छतागृहाच्या बाजूने फिरकणाऱ्यांना नाक दाबून प्रवास करावा लागत आहे. गेली अनेक दिवसांपासून हे स्वच्छतागृह बंद स्थितीत आहे. त्यामुळे त्याची अवस्था अधिकच बिकट झाली आहे. अलिबाग स्थानकाच्या परिसरातील कोपऱ्यात गेल्या अनेक वर्षांपासून असलेल्या स्वच्छतागृहात जाणे नकोसे झाले आहे. दुर्गंधीबरोबरच साचलेल्या सांडपाण्यामुळे आरोग्याचा प्रश्न निर्माण झाला आहे. अलिबागसह अन्य स्थानकाच्या स्वच्छतेसाठी प्रवाशांकडून दोन रुपये स्वच्छता भार कराच्या रुपात एसटी महामंडळाकडून घेतला जातो. कर घेऊनही अलिबाग स्थानकात स्वच्छतेचे तिनतेरा अशी परिस्थिती आहे.

आगार व्यवस्थापकांचे दुर्लक्ष
अलिबाग एसटी बस स्थानकातील स्वच्छतागृहामधील अस्वच्छतेबाबत गेल्या अनेक दिवसांपासून प्रवासी वर्गाकडून तक्रारी केल्या जात आहेत. मात्र, या तक्रारीचे निराकरण करण्यास आगार व्यवस्थापक उदासीन ठरले आहेत. आगार व्यवस्थापकांकडून अक्षम्य दुर्लक्ष होत असल्याचा आरोप प्रवासीवर्गाकडून व्यक्त केला जात आहे.

हिरकणी कक्षाला गवताचा विळखा
अलिबाग एसटी बस आगारात महिलांसाठी हिरकणी कक्ष उभारण्यात आले आहे. गेल्या अनेक महिन्यांपासून हे कक्ष बंद स्थितीत आहे. त्यामुळे या हिकरणी कक्षाच्या बाजूला गवत वाढले असून, हे कक्ष वाहन पार्किंगचे केंद्र बनले आहे. आगारात वेगवेगळी सुरक्षा यंत्रणा असतानाही याकडे मात्र अक्षम्य दुर्लक्ष असल्याचे दिसून आले आहे.