School Repairs: आचारसंहितेमुळे रायगडातील शाळांच्या दुरुस्तीवर संकट

निविदा प्रक्रियेलाच ब्रेक; शाळा सुरू होण्यापूर्वी शिक्षण विभागाची धावपळ

| रायगड | जिल्हा प्रतिनिधी |

रायगड जिल्हा परिषदेकडील तब्बल 315 शाळा नादुरुस्त अवस्थेत असून, त्यांच्या दुरुस्तीसमोर आता निवडणूक आचारसंहितेचा मोठा अडथळा उभा राहिला आहे. विधान परिषद निवडणुकीच्या पार्श्वभूमीवर लागू झालेल्या आचारसंहितेमुळे शाळा दुरुस्तीची प्रक्रिया रखडण्याची शक्यता निर्माण झाली असून, शिक्षण विभागाची मोठी तारांबळ उडाली आहे. दुरुस्तीची कामे सुरू करण्यासाठी निविदा प्रक्रिया राबविण्यापासून इतर प्रशासकीय कामांपर्यंत अनेक अडचणी निर्माण झाल्या आहेत. त्यामुळे निवडणूक आयोगाची विशेष परवानगी घेतल्याशिवाय ही कामे पुढे सरकणे कठीण असल्याचे चित्र आहे.

रायगड जिल्हा परिषद प्राथमिक शिक्षण विभागाच्या अखत्यारित एकूण 2 हजार 473 शाळा असून, त्यामध्ये सुमारे 95 हजारांहून अधिक विद्यार्थी शिक्षण घेत आहेत. निसर्ग चक्रीवादळ, अतिवृष्टी आणि सततच्या पावसामुळे जिल्ह्यातील 315 शाळांचे मोठ्या प्रमाणात नुकसान झाले आहे. अलिबाग, कर्जत, खालापूर, महाड, माणगाव, मुरूड, पेण, रोहा, सुधागड, म्हसळा आणि पोलादपूर तालुक्यातील शाळांना सर्वाधिक फटका बसला आहे. त्याखालोखाल उरण, तळा, श्रीवर्धन आणि पनवेल तालुक्यातील प्रत्येकी पाच ते दहा शाळा बाधित झाल्या आहेत.

या शाळांच्या दुरुस्तीसाठी तब्बल 25 कोटी रुपयांचा खर्च अपेक्षित आहे. त्यासाठी शिक्षण विभागाने जिल्हा नियोजन समिती, जिल्हा परिषद सेस फंड तसेच केंद्र सरकारच्या समग्र शिक्षण अभियानाकडे 25 कोटी 83 लाख रुपयांची मागणी केली आहे.

सध्या जिल्हा परिषद शाळांना उन्हाळी सुट्टी असून 14 जूनपासून शाळा सुरू होणार आहेत. शाळा सुरू होण्यासाठी अवघे काही दिवस शिल्लक असताना अनेक शाळांची अवस्था गंभीर आहे. काही शाळांच्या भिंती तडकल्या आहेत, खिडक्या व पत्रे खराब झाली आहेत, तर काही शाळांच्या इमारती जीर्ण अवस्थेत पोहोचल्या आहेत. विद्यार्थ्यांच्या सुरक्षेच्या दृष्टीने तातडीने दुरुस्ती होणे आवश्यक असतानाच आचारसंहितेमुळे ही कामे रखडण्याची भीती व्यक्त केली जात आहे. शाळा दुरुस्तीसाठी शिक्षण विभागाने नियोजन पूर्ण केले होते. मात्र, विधान परिषद निवडणुकीची आचारसंहिता लागू झाल्याने निविदा प्रक्रिया आणि निधीविषयक हालचालींवर मर्यादा आल्या आहेत. त्यामुळे शाळा सुरू होण्यापूर्वी दुरुस्ती पूर्ण होईल का, याबाबत प्रश्नचिन्ह निर्माण झाले आहे.

नुकसान झालेल्या शाळांवर दृष्टीक्षेप
अलिबाग - 35
कर्जत - 24
खालापूर - 38
महाड - 24
माणगाव - 20
म्हसळा - 19
मुरूड - 26
पनवेल - 08
पेण - 33
पोलादपूर - 14
रोहा - 35
श्रीवर्धन - 06
सुधागड - 18
तळा - 05
उरण - 10
– 
एकूण - 315