| अलिबाग | विशेष प्रतिनिधी |
रायगड जिल्ह्यातील सर्व लोकप्रतिनिधींना सोबत घेवून काम करावयाचे आहे. आपण जिल्ह्याच्या सर्वांगीण विकासासाठी कटिबद्ध असून रायगड जिल्ह्यासाठी शासनाकडून सन 2022-23 करिता प्राप्त झालेला विकासनिधी संबंधित यंत्रणांनी विहीत कालावधीत खर्च करावा, असे प्रतिपादन जिल्ह्याचे पालकमंत्री उदय सामंत यांनी गुरुवारी ( 13 ऑक्टोबर) अलिबाग येथे केले. जिल्हा नियोजन व विकास समितीची बैठक जिल्हा नियोजन भवन येथे सामंत यांच्या अध्यक्षतेखाली पार पडली, त्यावेळी ते बोलत होते.
या बैठकीत मागील बैठकीचे इतिवृत्त व त्यावरील कार्यवाहीच्या अहवालास समितीमार्फत मान्यता देण्यात आली. सन 2022-23 चा प्रारुप आराखडा व सन 2021-22 अंतर्गत दि. जानेवारी 2022 अखेरील खर्चाचा आढावा सादरीकरणाच्या माध्यमातून समितीसमोर मांडण्यात आला. सामंत यांनी उपस्थित लोकप्रतिनिधींनी मांडलेल्या विविध विषयांवर जिल्हा प्रशासनामार्फत तातडीने कार्यवाही करण्याचे निर्देश संबंधित अधिकार्यांना यावेळी दिले.
जिल्हा वार्षिक नियोजनच्या निधीतून सर्वांनी मिळून जिल्ह्याच्या सर्वांगीण विकासाला चालना देवू या, यासाठी सर्व पदाधिकारी आणि अधिकारी यांचे योगदान निश्चितच महत्वाचे राहणार आहे.
उदय सामंत,पालकमंत्री
जिल्हाधिकारी डॉ.महेंद्र कल्याणकर यांनी प्रास्ताविक केले. जिल्हा नियोजन अधिकारी यांनी यावेळी उपस्थित समिती सदस्यांना जिल्हा वार्षिक योजनेच्या निधीबद्दल माहिती दिली
66 टक्केच निधी खर्च
जिल्हा वार्षिक योजना (सर्वसाधारण) सन 2021-22 करिता रु. 275.00 कोटी इतका निधी अर्थसंकल्पित करण्यात आला असून प्राप्त निधीपैकी रु. 275.00 कोटी इतका निधी वितरीत करण्यात आला आहे. त्यापैकी सप्टेंबर 2022 अखेर रु.181.61 कोटी इतका निधी खर्च करण्यात आला असून खर्चाची टक्केवारी 66.00 टक्के इतकी आहे.
सन 2021-22 अंतर्गत सर्वसाधारण जिल्हा वार्षिक योजनेंतर्गत एकूण रु. 62.72 कोटी, अनुसूचित जाती उपयोजनेंतर्गत रु.1.20 कोटी व आदिवासी उपयोजनेंतर्गत रु. 6.56 कोटी असे एकूण रु. 70.48 कोटी इतक्या रकमेचे पुनर्विनियोजन करण्यात आले असून त्याचा तपशिल पुढीलप्रमाणे :-
सर्वसाधारण योजना-महसूली बचत 50.14 कोटी, भांडवली बचत 12.58 कोटी, महसूली वाढ 50.14 कोटी, भांडवल वाढ 12.58 कोटी, एकूण 62.72 कोटी. अनुसूचित जाती उपयोजना-महसूली बचत 1.20 कोटी, भांडवली बचत निरंक, महसूली वाढ 1.20 कोटी, भांडवल वाढ निरंक, एकूण 1.20 कोटी. आदिवासी उपयोजना-महसूली बचत 4.20 कोटी, भांडवली बचत 2.36 कोटी, महसूली वाढ 4.20 कोटी, भांडवल वाढ 2.36 कोटी, एकूण 6.56 कोटी. असे एकूण महसूली बचत 55.54 कोटी, भांडवली बचत 14.94 कोटी, महसूली वाढ 55.540 कोटी, भांडवल वाढ 14.94 कोटी, एकूण 70.48 कोटी.
आर्थिक वर्षात सर्वसाधारण जिल्हा वार्षिक योजनेंतर्गत रु. 320.00 कोटी तरतूद मंजूर करण्यात आली असून रु. 95.32 कोटी इतका निधी प्राप्त झाला आहे. अनुसूचित जाती उपयोजनेसाठी रु.25.64 कोटी तरतूद मंजूर असून रु.3.52 कोटी निधी प्राप्त झाला आहे. तसेच आदिवासी उपयोजनेसाठी रु.41.06 कोटी तरतूद मंजूर असून रु.8.62 कोटी निधी प्राप्त झाला असून त्याचा तपशिल पुढीलप्रमाणे:-
सर्वसाधारण योजना- अर्थसंकल्पिय तरतूद रु. 320.00 कोटी, प्राप्त तरतूद रु. 95.32 कोटी, वितरीत निधी रु. 12.41 कोटी. अनुसूचित जाती उपयोजना- अर्थसंकल्पिय तरतूद रु. 25.64 कोटी, प्राप्त तरतूद रु. 3.52 कोटी, वितरीत निधी रु. 1.28 कोटी. आदिवासी उपयोजना- अर्थसंकल्पिय तरतूद रु. 41.06 कोटी, प्राप्त तरतूद रु. 8.62 कोटी, वितरीत निधी रु. 0.99 कोटी. असे एकूण अर्थसंकल्पिय तरतूद रु. 386.70 कोटी, प्राप्त तरतूद रु. 107.46 कोटी, वितरीत निधी रु.14.68 कोटी.