सिडकोच्या सदनिकांकरिता संगणकीय सोडत संपन्न

| नवी मुंबई | प्रतिनिधी |

सिडकोच्या “माझे पसंतीचे सिडकोचे घर – माझा 1 चॉइस” गृहनिर्माण योजनेतील आर्थिकदृष्ट्या दुर्बल घटकाच्या 8,795 सदनिकांची संगणकीय सोडत सोमवारी (दि.20) सीबीडी बेलापूर येथील सिडको भवनात पार पडली. डिसेंबर 2025 मध्ये सुरू करण्यात आलेल्या या योजनेंतर्गत तळोजा, कळंबोली, खारघर, उलवे व खारकोपर येथे 8,795 ईडब्ल्यूएस सदनिका उपलब्ध करून देण्यात आल्या असून त्यासाठी 10,832 अर्ज प्राप्त झाले होते. सोडत पूर्णतः पारदर्शक व मानवी हस्तक्षेपविरहित पद्धतीने पार पडली असून, यशस्वी अर्जदारांची यादी सिडकोच्या अधिकृत संकेतस्थळावर प्रसिद्ध करण्यात आली आहे.

ही सोडत सिडकोचे उपाध्यक्ष तथा व्यवस्थापकीय संचालक अश्विन मुद्गल यांच्या हस्ते संपन्न झाली. यावेळी सहव्यवस्थापकीय संचालक शान्तनु गोयल, सहव्यवस्थापकीय संचालक डॉ. राजा दयानिधी यांच्यासह सुरेश मेंगडे, नरेंद्र भामरे, हबीबा ए. एल., श्रीनिवास मोकळीकर, तसेच सिडकोचे वरिष्ठ अधिकारी उपस्थित होते. या प्रसंगी बोलताना अश्विन मुद्गल यांनी, आर्थिकदृष्ट्या दुर्बल घटकांना हक्काची घरे उपलब्ध करून देण्याचे सिडकोचे लक्ष्य असून, उत्कृष्ट दर्जाचे बांधकाम साहित्य, अत्याधुनिक तंत्रज्ञानाचा वापर आणि नामांकित कंपन्यांकडून तयार करण्यात आलेला आराखडा सिडकोची घरे गुणवत्तापूर्ण असल्याचे प्रतिपादन केले. तसेच, या सोडत केवळ आर्थिकदृष्ट्या दुर्बल घटक प्रवर्गातील सदनिकांसाठी आयोजित करण्यात आली होती. अन्य प्रवर्गातील सदनिकांची सोडत मा. उच्च न्यायालयाच्या पुढील आदेशापर्यंत स्थगित ठेवण्यात आली आहे याची कृपया अर्जदारांनी नोंद घ्यावी, असेही त्यांनी सांगितले.