मतदान केंद्र कर्मचार्यावर मविआचा आक्षेप
| पनवेल | विशेष प्रतिनिधी |
कोकण शिक्षक मतदार संघासाठी सोमवारी मतदान घेण्यात आले. पनवेल तालुक्यात एकूण 4265 मतदार आहेत. यापैकी 1221 पुरुष व 2654 महिला मतदार एकूण 3875 मतदारांनी आपला मतदानाचा हक्क बजावला. यामध्ये महिला मतदारांची संख्या सर्वाधिक पाहायला मिळाली. यावेळी पनवेलमधील दि.बा.पाटील विद्यालयात मतदान केंद्रात नियुक्त असलेला कर्मचारी मतदारांची दिशाभूल करत असल्याचा आरोप महाविकास आघाडीच्या कार्यकर्त्यांनी केला.यामुळे बराच गदारोळ निर्माण झाला. कोकण शिक्षक मतदार संघासाठी उभारण्यात आलेल्या पनवेल शहरातील लोकनेते दि.बा.पाटील विद्यालय येथील मतदान एक कर्मचारी मतदारांची दिशाभूल करत असल्याचा आरोप पनवेल महापालिकेचे माजी विरोधी पक्षनेते प्रीतम म्हात्रे आणि माजी पंचायत समिती अध्यक्ष काशिनाथ पाटील यांनी केला. त्यामुळे मतदान केंद्रावर काही काळासाठी तणावाचे वातावरण निर्माण झाले होते. तहसीलदार विजय तळेकर यांनी प्रीतम म्हात्रे व काशिनाथ पाटील यांची समजूत घालत सदर कर्मचार्याला केंद्राबाहेर काढले. वातावरण निवळले.
पेणमध्ये 583 मतदान
कोकण शिक्षक मतदार संघाचे पेणमध्ये एकूण 596 मतदार होते, त्यापैकी 583 जणांनी आपला मतदानाचा हक्क बजावला. सकाळी 8 वाजल्यापासून मतदानाला सुरूवात झाली. सकाळच्या सत्रामध्ये संथगतीने मतदान सुरू होते. परंतु बारानंतर मोठया प्रमाणात शिक्षक वर्गांनी आपली हजेरी लावत मतदानासाठी गर्दी त्यामुळे पेण तहसिल कार्यालयात शिक्षकांची मोठी रांग पहायला मिळाली. अखेर 4 वाजेपर्यंत 583 जणांनी आपल्या मतदाना हक्क बजावला. मतदानाच्या दरम्यात कोणताही अनुचीत प्रकार घडू नये म्हणून पेण पोलीस ठाण्यातून चोख बंदोबस्त करण्यात आला होता.