काँग्रेसचे ॲड. प्रविण ठाकूर राष्ट्रवादीच्या वाटेवर

2 ऑगस्ट रोजी करणार प्रवेश

| उरण | वार्ताहर|

काँग्रेस पक्षाचे प्रदेश चिटणीस आणि रायगड जिल्ह्यातील ज्येष्ठ नेते ॲड. प्रविण मधुकर ठाकूर यांनी काँग्रेस पक्षाच्या सध्याच्या कार्यशैलीवर नाराजी व्यक्त करत, पक्षाला रामराम ठोकण्याचा निर्णय घेतला आहे. येत्या 2 ऑगस्ट 2025 रोजी, अलिबागमध्ये आयोजित विशेष कार्यक्रमात ते राष्ट्रवादी काँग्रेस पक्षात अधिकृतपणे प्रवेश करणार असून, यावेळी राज्याचे उपमुख्यमंत्री अजित पवार आणि रायगडचे खासदार तथा राष्ट्रवादी काँग्रेसचे प्रदेशाध्यक्ष सुनील तटकरे उपस्थित राहणार आहेत.

ॲड. प्रविण ठाकूर हे माजी आमदार मधुकर ठाकूर यांचे सुपुत्र असून, 2009 मध्ये त्यांनी रायगड लोकसभा मतदारसंघातून काँग्रेसच्या अधिकृत उमेदवाराविरोधात बंडखोरी करत निवडणूक लढवली होती. त्यांचा स्थानिक राजकारणात सक्रीय आणि प्रभावी हस्तक्षेप असून, अलिबाग नगरपरिषदेचे विरोधी पक्षनेते म्हणून त्यांनी उल्लेखनीय कामगिरी केली आहे.

प्रवेशासंदर्भात बोलताना ॲड. प्रविण ठाकूर म्हणाले, काँग्रेसमध्ये सध्या कुठलाही ताळमेळ उरलेला नाही. कार्यकर्त्यांचा आवाज दाबला जातोय. त्याउलट राष्ट्रवादी काँग्रेसकडून कोकण व रायगडसाठी स्पष्ट दिशा व धोरण आहे. या पार्श्वभूमीवर मी राष्ट्रवादी काँग्रेसमध्ये प्रवेश करण्याचा निर्णय घेतला आहे. अलीकडेच माणगाव येथील शिवसेनेचे नेते ॲड. राजू साबळे यांनी देखील राष्ट्रवादी काँग्रेसमध्ये प्रवेश केला. आता ॲड. प्रविण ठाकूर यांच्या प्रवेशामुळे रायगड जिल्ह्यात काँग्रेस आणि शिवसेना या दोन्ही पक्षांना मोठा राजकीय झटका बसणार आहे, तर राष्ट्रवादी काँग्रेसची ताकद अधिक वाढणार आहे. 2 ऑगस्ट रोजीचा कार्यक्रम अलिबागमध्ये आयोजित करण्यात आला असून, जिल्ह्यातील अनेक राजकीय नेते, कार्यकर्ते, पदाधिकारी आणि नागरिक मोठ्या संख्येने उपस्थित राहणार आहेत.