संकेत कुंभारची गगनभरारी

युपीएसपी परिक्षेत घवघवीत यश

| रायगड | जिल्हा प्रतिनिधी |

आपल्या जिद्द आणि चिकाटीच्या जोरावर संकेत कुंभार या तरुणाने स्पर्धा परीक्षेत घवघवीत यश संपादन केले. यूपीएससी अर्थात केंद्रीय लोकसेवा आयोगाच्या परीक्षेत त्याने गगनभरारी घेतली. त्याच्या यशाबद्दल रायगडसह रोहाच्या शिरपेचात मानाचा तुरा रोवला गेला आहे. भारतीय राजस्व सेवा अधिकारी म्हणून त्याची निवड झाली आहे.

संकेत कुंभारचे प्राथमिक शिक्षण रोहा येथील कोकण एज्युकेशन सोसायटी, मधुकर सीताराम गांगल प्रायमरी स्कूलमध्ये झाले. त्याचे माध्यमिक शिक्षण रोहा येथील मेहंदळे स्कूलमध्ये झाले. त्यानंतर सातारा जिल्ह्यातील कराड येथील सद्गुरु गाडगे बाबा, महाराष्ट्र कॉलेज येथे झाले. माणगावमधील लोणेरे येथील डॉ. बाबासाहेब आंबेडकर तंत्रशास्त्र विद्यापीठामध्ये मॅकेनिकल इंजिनिअरचे शिक्षण घेतले. संकेत कुंभार यांनी प्रशासकीय सेवेत जाण्याचे स्वप्न उराशी बाळगले होते. हे स्वप्न त्यांनी त्यांच्या मेहनतीमधून प्रत्यक्षात उतरवून दाखविले. यूपीएससी अर्थात केंद्रीय लोकसेवा आयोगाच्या परीक्षेत त्यांनी देदीप्यमान यश संपादन करून आपल्या स्वप्नाला प्रत्यक्षात उतरवून दाखविले. संकेत यांचे सर्वस्तरातून अभिनंदन करण्यात आले. संकेत कुंभार यांचे वडील रोहा तालुक्यातील कोकबन येथील न्यू इंग्लिश हायस्कूलध्ये शिक्षक आहेत. त्यांची आई गृहिणी आहे. आई, वडिलांकडून मिळालेल्या प्रोत्साहनामुळे आणि शिक्षकांकडून मिळालेले मार्गदर्शनातून स्पर्धा परीक्षेत संकेत यांनी घवघवती यश मिळवले.

माणगाव तालुक्यातील लोणेरे येथील डॉ. बाबासाहेब आंबेडकर तंत्रशास्त्र विद्यापीठामध्ये मॅकेनिकल इंजिनिअरचे शिक्षण घेत असताना तृतीय वर्षामध्ये संकेत कुंभार यांनी एक प्रोजेक्ट तयार केला होता. जिल्ह्यात दुचाकी संख्या दिवसेंदिवस वाढत आहे. त्यांच्या सुरक्षेसाठी तसेच हेल्मेटचे महत्त्व पटवून देण्यासाठी संकेत यांनी त्यावेळी दुचाकीस्वारांसाठी फुल फेस फोल्डेबल तसेच एडजेस्टेबल हेल्मेट बनविले होते. ‌‘ऑनलाईन अन्वेषण’ या राष्ट्रीय संशोधन स्पर्धेत बेसिक सायन्स विभागातून इंदुर येथे देशपातळीवरील स्पर्धेत प्रथम क्रमांक मिळविला होता. महाविद्यालय जीवनात संकेत कुंभार यांच्या संशोधक वृत्तीला चालना मिळाली. आपल्या अभ्यास व संशोधक वृत्तीने स्पर्धा परीक्षेत यश संपादन करून रायगडसह रोहा तालुक्याचे नावलौकिक केले.