लाचखोर कर अधिकारी एसीबीच्या जाळ्यात

| रायगड | जिल्हा प्रतिनिधी |

नवी मुंबई येथील जीएसटी विभागातील लाचखोर व्यवसाय कर अधिकारी लाचलुचपत प्रतिबंधक विभागाच्या जाळ्यात सापडला. त्याला 9 हजार रुपयांची लाच घेताना रंगेहाथ पकडण्यात आले. ही लाच घेतल्याप्रकरणी त्याच्याविरोधात सीबीडी पोलीस ठाण्यात गुन्हा दाखल करण्यात आला असून, त्यामध्ये एका महिलेचाही सहभाग असल्याची माहिती उपलब्ध झाली आहे.

मिळालेल्या माहितीनुसार, अमित गिरी (45) असे लाचखोर अधिकाऱ्याचे नाव आहे. हा कोकण भवन जीएसटी विभागात व्यवसाय कर अधिकारी म्हणून कार्यरत आहे. तक्रारदार यांचे सॉफ्टवेअर डेव्हलपमेंटचा व्यवसाय आहे. त्यांना पीटीईसी आणि पीटीआरसी संदर्भात जीएसटी विभागातून अमित गिरी यांच्या मेल वरून कारणे दाखवा नोटीस बजवण्यात आली होती. याबाबत गिरी यांना भेटण्यासाठी तक्रारदार त्यांच्या कार्यालयात गेले. गिरी यांनी कार्यालयातील वैशाली कदम नावाच्या महिलेला भेटण्यास सांगितले. त्यांनी कागदपत्रांची पडताळणी करून त्यांना 23 हजार रुपयांची रक्कम भरावी लागणार, असे सांगितले. त्यापैकी 13 हजार रुपयांची पावती व 10 हजार रुपये फाईल बंद करण्यासाठी वरिष्ठांना द्यावे लागतील, असे सांगितले. याबाबत तक्रारदार यांनी नवी मुंबई लाचलुचपत प्रतिबंधक विभागाकडे तक्रार केली. पोलीस उपअधीक्षक धर्मराज सोनके यांनी घटनेचे गांभीर्य ओळखून पडताळणी केली. त्यानुसार सोमवारी (दि 6) सायंकाळी सापळा रचण्यात आला. या सापळ्यात 9 हजार रुपयांची लाच घेताना रंगेहाथ पकडण्यात आले. त्यातील 2 हजार रुपये वैशाली कदम आणि 7 हजार रुपयांची लाच कर अधिकारी अमित गिरी यांनी स्विकारल्याचे दिसून आले. ही कारवाई सायंकाळी साडेसहा वाजण्याच्या सुमारास करण्यात आली असल्याची माहिती उपलब्ध झाली आहे.