क्रिकेट शौकिनांना मेजवानी; स्पर्धेची आयोजकांकडून जोरदार तयारी
| माणगाव | प्रतिनिधी |
संपूर्ण तालुक्याचे लक्ष लागून असलेल्या माणगाव प्रीमियर लीग क्रिकेट स्पर्धेच्या महासंग्रामाला शनिवार, दि. 2 डिसेंबरपासून सुरुवात होणार आहे. ही स्पर्धा रविवार, दि. 10 डिसेंबरपर्यंत सामाजिक कार्यकर्ते अल्ताफदादा धनसे यांच्या माणगाव मोर्बा रोड मार्गावरील मैदानावर रंगणार असून, क्रिकेट शौकिनांसाठी ही एक मेजवानी आहे. या स्पर्धेची जोरदार तयारी प्रीमियर लीगचे संस्थापक तथा आयोजक रायगड जिल्हा परिषदेचे माजी सभापती ॲड. राजीव साबळे, कार्याध्यक्ष तथा खरवली ग्रामपंचायतीचे नवनिर्वाचित सरपंच संतोष खडतर, कार्याध्यक्ष तथा भुवन ग्रामपंचायतीचे नवनिर्वाचित सरपंच दीपक जाधव यांच्या मार्गदर्शनाखाली प्रीमियर लीगचे अध्यक्ष भाई दसवते, सल्लागार निलेश केसरकर, वैभव टेंबे, मंगू जाधव, उपाध्यक्ष फहद करबेळकर, सागर पाशिलकर, नंदुराज वाढवळ, सचिव वैष्णव साठे, सहसचिव रोहित रातवडकर, खजिनदार बाळा पोवार, निलेश उभारे, सहखजिनदार समीर महाडिक, सदस्य राहुल बक्कम, केदार जाधव, मुकुल मेहता व सहकाऱ्यांनी केली आहे.
ही स्पर्धा म्हणजे तालुक्याची शान आहे. या स्पर्धेकडे दरवर्षी तालुक्याचे लक्ष लागून असते. यंदा स्पर्धेचे हे तिसरे पर्व आहे. या स्पर्धेत तालुक्यातील 32 संघ सहभागी होणार आहेत. या स्पर्धेकरिता आयोजकांनी अल्ताफदादा धनसे मैदान सजविले आहे. या स्पर्धेत आकर्षक अशी पारितोषिके ठेवण्यात आली आहेत. प्रथम क्रमांक 1 लाख रुपये, द्वितीय क्रमांक 50 हजार रुपये, तृतीय व चतुर्थ क्रमांक प्रत्येकी 30 हजार रुपये, पाचवा, सहावा, सातवा व आठवा क्रमांक प्रत्येकी 15 हजार रुपये तसेच इतर वैयक्तिक बक्षिसांमध्ये उत्कृष्ट फलंदाज व गोलंदाज यांना सायकल, मालिकावीर व प्रथम क्रमांकाच्या विजेता संघ मालकास यांना फ्रिज तसेच स्पर्धेतील प्रथम व द्वितीय क्रमांकाच्या विजेत्या संघातील 28 खेळाडूंना बूट अशी बक्षिसे ठेवण्यात आली आहेत. तरी क्रिकेट शौकिनांनी या स्पर्धेला मोठ्या संख्येने उपस्थित राहून स्पर्धेची शोभा वाढवावी, असे आवाहन आयोजकांतर्फे करण्यात आले आहे.