चिंचघरमध्ये युवकावर मगरीचा हल्ला

। खेड । प्रतिनिधी ।
खेड तालुक्यातील आणि शहरालगत असलेल्या चिंचघर प्रभूवाडीमध्ये राहणार्‍या जीवन हरिश्‍चंद्र कडू (25) या युवकावर गावातीलच नारंगी नदीपात्रातील दगडावना या ठिकाणी मगरीने हल्ला केला. या हल्ल्यात त्याला व त्याच्या बैलाला जखमी केल्याची घटना रविवार, दि. 8 मे रोजी सायंकाळी 4 ते 4.30 वाजताच्या सुमारास घडली. जखमी जीवन कडू याला उपचारार्थ दापोली येथील शासकीय रुग्णालयात दाखल करण्यात आले. त्याच्या तब्येतीत सुधारणा होत आहेत. याबाबत हकीकत अशी की, जीवन कडू हे आपल्या बैलाला पाणी पाजण्यासाठी नदी पात्रात उतरवले होते. पाणी पाजत असताना मगरींनी त्याच्यावर आणि बैलावर अचानक हल्ला चढवत जीवन कडूच्या हाताला चावा घेऊन, तर बैलावरदेखील हल्ला चढवत जखमी केल्याची घटना घडली. या प्रकारामुळे भीतीचे वातावरण निर्माण झाले आहे.