माथेरानमध्ये पर्यटकांची मांदियाळी

घाटरस्त्यावर वाहनांच्या रांगाच रांगा; कर संकलनाचे नियोजन बिघडले

| नेरळ | प्रतिनिधी |

पावसाळी पर्यटनाचा आनंद लुटण्यासाठी रविवारी (दि. 12) हजारो पर्यटकांनी माथेरानकडे धाव घेतल्याने संपूर्ण पर्यटनस्थळ गजबजून गेले. पर्यटकांच्या प्रचंड गर्दीमुळे माथेरान नगरपरिषदेच्या स्वच्छता कर संकलन व्यवस्थेवर ताण आला असून, दस्तुरी नाका प्रवेशद्वारावर लांबच लांब रांगा, वाहतूक कोंडी आणि गोंधळाचे चित्र पाहायला मिळाले.

पावसाळ्यात माथेरानमध्ये दरवर्षी मोठ्या संख्येने पर्यटक येतात. यंदाही पावसाळा सुरू झाल्यापासून पर्यटकांचा ओघ कायम आहे. गेल्या चार दिवसांपासून पावसाने विश्रांती घेतली असली, तरी पर्यटकांची संख्या कमी झालेली नाही. शनिवारीप्रमाणे रविवारीही हजारो पर्यटक माथेरानमध्ये दाखल झाले. सकाळपासून नेरळ–माथेरान घाटरस्त्यावर वाहनांची मोठी गर्दी झाल्याने वाहतूक अत्यंत मंदगतीने सुरू होती. अनेक पर्यटकांची वाहने घाटरस्त्यातील वाहतूक कोंडीत अडकून पडली. यामुळे पर्यटकांची मोठी गैरसोय झाली.

दुसरीकडे दस्तुरी नाका येथे स्वच्छता कर भरण्यासाठी पर्यटकांच्या लांबच लांब रांगा लागल्या. कर भरल्याशिवाय शहरात प्रवेश दिला जात नसल्याने प्रवेशद्वारावर मोठी गर्दी झाली. कर संकलन कार्यालयाबाहेर सकाळपासून किरकोळ वाद आणि धक्काबुक्कीचे प्रकारही घडल्याचे दिसून आले. पर्यटकांच्या रांगा टॅक्सी स्टँड आणि वाहनतळाच्या दिशेने वाढल्याने वाहनतळाकडे जाणारी वाहनेही अडकून पडली. एकावेळी सुमारे एक हजार वाहने उभी राहू शकतील अशा वाहनतळाकडे जाणारे मार्ग गर्दीमुळे पूर्णपणे विस्कळीत झाले. माथेरान–अमन लॉजदरम्यान धावणाऱ्या मिनी ट्रेनच्या शटल सेवेलाही मोठी गर्दी झाली होती. स्थानकात शेकडो पर्यटक प्रतीक्षेत उभे होते. अनेक तरुण पर्यटक पायीच शहरात प्रवेश करत असल्याचे चित्रही दिसून आले. पावसाचा एकही थेंब न पडताही माथेरानमध्ये पर्यटकांची विक्रमी गर्दी झाल्याने पर्यटन व्यवसायाला मोठी चालना मिळाली असली, तरी वाहतूक आणि गर्दी व्यवस्थापनाचे नियोजन कोलमडल्याचे स्पष्ट झाले.

ई-रिक्षा अपुऱ्या
माथेरान शहरात जाण्यासाठी असलेल्या ई-रिक्षा स्टँडवरही शेकडो पर्यटकांची गर्दी झाली होती. शहरात पर्यटकांच्या सेवेसाठी केवळ 25 ई-रिक्षा उपलब्ध असल्याने त्या अपुऱ्या पडत असून पर्यटकांना बराच वेळ प्रतीक्षा करावी लागत आहे.