नऊ एकरातील झाडे जमीनदोस्त
| नेरळ | प्रतिनिधी |
कर्जत तालुक्यात कशेळे-नेरळ राज्यमार्ग रस्त्यावर तेथील एका मोकळ्या जमिनीवरील झाडे अचानक जमीनदोस्त झाली आहेत. त्याबद्दल स्थानिकांनी वन विभागाच्या परवानगीने झाडे तोडण्यात आली असल्याचे बोलले जात असून, त्यातून आलेली माहिती धक्कादायक आहे. त्या ठिकाणी शेतकर्यांसाठी असलेली झाडे जमीनदोस्त झाली आहेत. याबाबत वन विभागाने दिलेला परवाना यापेक्षा दुप्पट जमिनीवरील झाडांची कत्तल करण्यात आली आहे. तरीदेखील जंगलतोड करणार्या ठेकेदारावर वन अधिकार्यांकडून कोणतीही कारवाई करण्यात आलेली नाही. दरम्यान, अशा वन अधिकार्यांवर कारवाई व्हावी यासाठी जिल्हा उप वनसंरक्षक यांच्याकडे तक्रार करण्याची तयारी पर्यावरणप्रेमींकडून सुरु आहे.
कर्जत वन विभागाच्या हद्दीत असलेल्या कशेळे ग्रामपंचायतीमधील कवठेवाडी येथे नेरळ-कशेळे रस्त्याच्या अगदी लगत जंगलतोड झाली आहे. या जंगलतोडीसाठी संबंधित शेतकर्यांकडून वन विभागाकडे परवाना मागण्यात आला होता. तसेही त्या भागात मोठ्या प्रमाणात आणि 30-40 वर्षांची झाडे नव्हती. मात्र, आपली जमीन वृक्षमुक्त करण्यासाठी संबंधित जमीन मालकाने वृक्षतोड करण्यासाठी परवाना मागितला. यासाठी आदिवासी क्षेत्र असतानादेखील कर्जत वन विभागाने खात्री न करता जंगलतोड करण्याची परवानगी त्या शेतकर्याला दिली. त्यावेळी खात्रीलायक सूत्रांकडून मिळालेल्या माहितीनुसार, वन विभागाने दिलेल्या परवानगीच्या दुप्पट जमिनीमधील झाडे तोडण्यात आली असल्याचे दिसून येत आहे. त्यात संबंधित भागातील अन्य शेतकर्याच्या जमिनीमधील चार ते पाच एकर जमिनीमधील जुनी झाडे या ठेकेदाराने घेतलेल्या परवानगीमध्येच तोडून टाकली आहेत.
मुळात, कवठेवाडी येथील आदिवासी शेतकर्याला आपल्या जमिनीमधील झाडांची तोड कोणत्याही कामासाठी करायची नव्हती. मात्र, वन विभागाच्या त्या ठेकेदाराने संपूर्ण नऊ एकरमधील जमिनीवरील झाडे तोडून टाकली आहेत. त्याबद्दल स्थानिक पातळीवर वन अधिकारी हे कोणाचेही ऐकण्याच्या मनःस्थितीत नसतात. त्याचवेळी परवानाशिवाय अधिक जमिनीवरील झाडांची तोड केली गेली असतानादेखील कर्जत वनक्षेत्र अधिकारी यांच्याकडून ठेकेदारावर कारवाई केली जात नाही. त्यामुळे कर्जत तालुक्यातील अशा जंगलतोडीबद्दल जिल्हा उपवन संरक्षक यांच्याकडून कारवाई व्हावी या मागणीसाठी आता पत्रव्यवहार करण्याचा निर्णय स्थानिकांनी घेतला आहे. तर, कर्जत प्रेस असोसिएशनकडून जिल्हा उप वनसंरक्षक यांना पत्र देऊन कर्जत तालुक्यातील संपूर्ण जंगलतोड प्रकाराची चौकशी करण्याची मागणी केली जाणार आहे.
संबंधित आदिवासी मालकी जमिनीतील जंगलतोड झालेला माल साठवून ठेवण्यात आला आहे. त्या मालाची विक्री करण्याची परवानगी आम्ही जिल्हा कार्यालयाकडे मागितली आहे. ती परवानगी आल्यावर मालाचा लिलाव केला जाईल.
रमेश चव्हाण, वनक्षेत्रपाल, कर्जत