105 भारतीय पर्यटक बेपत्ता
| रसुवा | वृत्तसंस्था |
नेपाळच्या रसुवा जिल्ह्यात भोटे कोशी नदीला अचानक आलेल्या भीषण पुरामुळे मोठी हानी झाली आहे. या दुर्घटनेत अनेकांचा मृत्यू झाला असून 41 सुरक्षा कर्मचारी बेपत्ता असल्याची माहिती मिळत आहे. बेपत्ता कर्मचाऱ्यांमध्ये नेपाळ पोलिसांचे 32 आणि सशस्त्र पोलिस दलाचे 9 जवान आहेत. त्याचबरोबर 291 परदेशी नागरिक बेपत्ता झाल्याचे सांगितले जात आहे. यामध्ये 105 पर्यटक भारतीय असल्याचे सांगण्यात येत आहे.
भोटे कोशी नदीच्या पाण्याची पातळी अचानक वाढल्याने तिबेट सीमेजवळील तिमुरे आणि स्याफ्रु बेसी परिसराला मोठा फटका बसला. पुराच्या वेगवान प्रवाहात अनेक वाहने आणि स्थानिक भाग वाहून गेले. रस्ते आणि पूल तसेच जलविद्युत प्रकल्पांच्या पायाभूत सुविधांचेही मोठे नुकसान झाले आहे. दुर्घटनेमुळे किती नुकसान झाले आहे याचे नेमके स्वरूप अद्याप स्पष्ट झालेले नाही.
291 परदेशी नागरिक बेपत्ता
नेपाळ पर्यटन मंडळाच्या माहितीनुसार, पुरामुळे 291 परदेशी नागरिक बेपत्ता असल्याची माहिती समोर आली आहे. त्यापैकी किमान 105 भारतीय पर्यटक असल्याचे सांगण्यात आले आहे. दरम्यान, बचाव पथकांकडून बेपत्ता नागरिक आणि सुरक्षा कर्मचाऱ्यांचा शोध सुरू असून, पुरामुळे बाधित भागांमध्ये मदत आणि बचावकार्याला वेग देण्यात आला आहे.
बेपत्ता सुरक्षा कर्मचाऱ्यांचा शोध सुरू
पुरामुळे प्रभावित भागात मोठ्या प्रमाणावर बचाव आणि शोधमोहीम सुरू करण्यात आली आहे. सुरक्षा दलांकडून पूरग्रस्त वस्त्या, रस्ते आणि इतर पायाभूत सुविधांच्या परिसरात बेपत्ता व्यक्तींचा शोध घेतला जात आहे. नेपाळचे पंतप्रधान बालेन शाह यांनी सांगितले की, पोलीस आणि लष्करी जवानांसह आपत्कालीन पथके बाधित भागात पाठवण्यात आली आहेत. खालच्या भागात नदीकाठावर राहणाऱ्या नागरिकांना सुरक्षित ठिकाणी हलवण्याच्या सूचना प्रशासनाला देण्यात आल्याचे शाह यांनी सांगितले.