रेवदंड्यात पुन्हा डिझेल तस्करी?; नव्या एसपींच्या कारवाईकडे लक्ष
आमदारांचा प्रकरण दाबण्यासाठी दबाव
| अलिबाग | प्रतिनिधी |
सीमा शुल्क विभागाने जानेवारीच्या शेवटच्या आठवड्यात कारवाई करीत सुमारे चार डिझेलचे टँकर व दोन मासेमारी बोटी जप्त केल्या होत्या. रेवदंडा पोलीस ठाण्याच्या हाकेच्या अंतरावर असलेल्या बंदराजवळ ही कारवाई झाली होती. त्यानंतर रेवदंड्यात दोन दिवसांपूर्वी डिझेल तस्करीवर कारवाई झाल्याची माहिती समोर येत आहे. हे प्रकरण दाबण्यासाठी विद्यमान आमदार दळवी यांनी दबाव आणण्याचे बोलले जात आहे. नव्या पोलीस अधीक्षकांना डिझेलतस्करांनी आव्हान देत सलामी दिली आहे. त्यामुळे एसपी या डिझेलतस्करांना रोखण्यात यशस्वी ठरतील का, असा सवाल उपस्थित केला जात आहे.
26/11 मध्ये झालेल्या दहशतवादी हल्ल्यानंतर जिल्ह्यातील सागरी किनारे मजबूत करण्यासाठी सुरक्षा यंत्रणा कामाला लागली. रायगड जिल्ह्यात पर्यटन व औद्योगिकीकरण वाढल्याने सागरी मार्गाने नोकरी-व्यवसायासह फिरण्यासाठी येणाऱ्यांची संख्या वाढली आहे. मागील काही महिन्यांपूर्वी पनवेल पोलिसांनी डिझेलची वाहतूक करणाऱ्या ट्रकवर कारवाई केली होती. रेवदंडा बंदरातूनच हे डिझेल आणल्याची माहिती उघड झाली होती. रेवदंडा पोलीस ठाण्यापासून हाकेच्या अंतरावर ही तस्करी सुरु असतानाही त्यांच्याकडून कारवाई होत नसल्याने पोलिसांच्या भूमिकेबाबत नाराजी व्यक्त करण्यात आली होती.
जानेवारी महिन्याच्या शेवटच्या आठवड्यात सीमा शुल्क विभागाने पहाटेच्या सुमारास रेवदंडा बंदरावर छापा टाकला. या छाप्यात डिझेलची तस्करी करणारी मंडळी दिसून आली. यावेळी संबंधित विभागाने कारवाई करीत कोट्यवधी रुपयांचा साठा जप्त केला. त्यामध्ये टँकरसह दोन बोटींचाही समावेश होता. या कारवाईनंतर काही दिवस डिझेलतस्करीला ब्रेक लागला होता. मात्र, गेल्या दोन दिवसांपूर्वी रेवदंडा बंदरावर पुन्हा डिझेलवरतस्करीवर कारवाई झाली. रेवदंडा पोलीस ठाणे या घटनेपासून हाकेच्या अंतरावर आहे. तरीदेखील डिझेलतस्करीबाबत अनभिज्ञ असल्याने नाराजीचे सूर उमटत आहेत. हे प्रकरण दाबण्यासाठी विद्यमान आमदार दळवी यांनी संबंधित यंत्रणेवर दबाव टाकण्याचा प्रयत्न केला आहे. जिल्ह्यात नव्याने आंचल दलाल पोलीस अधीक्षक म्हणून रूजू झाल्या आहेत. त्या एक डॅशिंग पोलीस अधिकारी म्हणून ओळखल्या जातात. आता त्यांनाच अवैध धंद्येवाल्यांनी खुलेआमपणे आव्हान दिले आहे. पोलीस अधीक्षक आता काय भूमिका घेणार याकडे लक्ष लागून राहिले आहे.
रेवदंड्यात गांजा विक्रेत्यांवर कारवाई करण्यात आली आहे. या अवैध धंद्यावर लवकरच कारवाई करून जिल्ह्यात कायदा व सुव्यवस्था अबाधित राखण्याचा प्रयत्न केला जाईल.अवैध धंद्याबाबत काय भूमिका घेतली जाईल हे लवकरच दिसून येईल.
आंचल दलाल,
पोलीस अधीक्षक, रायगड
Leave a Reply
On 7th June 1937, Krushival was started as a weekly magazine and the masses got their platform. In the Raigad district, many new movements were launched to fight against injustice and exploitation upon the underprivileged and the hard-working common people.