| महाड | प्रतिनिधी |
शासनातर्फे महाड व पोलादपूर तालुक्यातील पन्नास स्वयंसेवकांना बारा दिवसाचे निवासी प्रशिक्षण आयोजित करण्यात आले. आपत्ती व्यवस्थापना संदर्भातील प्रशिक्षण डॉ. बाबासाहेब आंबेडकर सभागृह चवदार तळे येथे घेण्यात आले. या कार्यशाळेचे उद्घाटन उपविभागीय अधिकारी प्रतिमा पुदलवाड यांचे हस्ते झाले.
राष्ट्रीय आपत्ती व्यवस्थापन प्राधिकरण आणि राज्य आपत्ती व्यवस्थापन प्राधिकरण मुंबई यांच्या संयुक्त विद्यमाने पुरस्कृत रायगड जिल्हा आपत्ती व्यवस्थापन प्राधिकरण यांच्या माध्यमातून आपदा मित्र प्रशिक्षण कार्यक्रम महाडमध्ये आयोजित केला आहे. हे प्रशिक्षण पंधरा दिवस चालणार आहे. या प्रशिक्षण कार्यशाळेचे उद्घाटनप्रसंगी जिल्हा आपत्ती व्यवस्थापनचे सागर पाठक, तहसीलदार सुरेश काशीद, आदी प्रमुख अधिकारी उपस्थित होते.
यावेळी तहसीलदार सुरेश काशीद यांनी प्रशिक्षणाचा हेतू स्पष्ट करताना महाड तालुक्यात सातत्याने आपत्तीला सामोरे जावे लागते. येथील पूर परिस्थिती, औद्योगिक क्षेत्र, घाटमार्ग यामुळे विविध अपघात होत असतात.यासाठी स्थानिक पातळीवर स्वयंसेवक तयार करून त्यांच्यामार्फत आपत्कालीन परिस्थितीत हाताळून प्राथमिक पातळीवर काम केले जावे म्हणून प्रशिक्षण दिले जात आहे असे सांगितले. तर निसर्गचक्र बदलामुळे आपत्कालीन परिस्थितीत वाढ झाली आहे. सातत्याने आपदा निर्माण होत आहे. यामुळे या आपदेला सामोरे जाण्यासाठी समुदाय उपयोगात येतो. या समुदायाला तयार करून त्यांना प्रशिक्षण देण्याचा कार्यक्रम राबवला जात आहे. समुदाय संघटन आणि जनजागृती हा या कार्यशाळेचा मुख्य उद्देश आहे असे स्पष्ट करून वीस जिल्ह्यात ही संकल्पना राबवली जात आहे. या स्वयंसेवकांना मानधन दिले जात नाही मात्र त्यांनी आपली सामाजिक बांधिलकी जपली पाहिजे. या प्रशिक्षित युवकांचा पाच लाखाच्या विमा काढला जाणार आहे. 200 स्वयंसेवकांना ओरिसा येथे प्रशिक्षण दिले आहे असे रायगड जिल्हा आपत्ती व्यवस्थापनाचे सागर पाठक यांनी सांगितले.
आपदा प्रशिक्षण कार्यक्रमाचा हेतू स्पष्ट करताना प्रतिमा पुदलवाड यांनी तालुक्यातील दुर्घटना पाहता याठिकाणी अधिकाधिक लोकांनी प्रशिक्षण घेतले पाहिजे असे सांगून आपत्कालीन परिस्थिती हाताळताना शास्त्रीय पद्धतीने तयारी केली पाहिजे. याकरिता हे प्रशिक्षण महत्वाचे ठरणार आहे. जीव वाचवताना समाधान लाभणे. आपदा येईल हे सांगता येत नाही मात्र त्या आपदेला सामोरे जाण्यासाठी तयारी असणे गरजेचे आहे. एक अपादा प्रशिक्षक आणखी दहा प्रशिक्षित स्वयंसेवक तयार होणार आहेत असे स्पष्ट केले. या बारा दिवस चालणार्या कार्यशाळेच्या कार्यक्रम पूर्ण करण्यासाठी निवासी नायब तहसीलदार तिरमिले , भादेकर, व त्यांचे सहकारी मेहनत घेत आहेत.