गतिमंद तरुणीवरील अत्याचार प्रकरण: आठ संशयितांचे डीएनए नमुने निगेटिव्ह

। नवीन पनवेल । प्रतिनिधी ।

एका गतिमंद तरुणीवर अत्याचार करून ती तरुणी गर्भवती राहिली आणि तिने एका मुलीला जन्म दिला. याप्रकरणी पनवेल तालुका पोलीस ठाण्यात अनोळखी इसमाविरोधात जून महिन्यात गुन्हा दाखल करण्यात आला. पोलिसांनी संशयितांचे डीएनए नमुने घेतले होते. मात्र आठही जणांचे डीएनए नमुने ऑगस्ट महिन्यात निगेटिव्ह आले आहेत. त्यामुळे या गुन्ह्याचा तपास करण्यासाठी पोलिसांना आणखी कष्ट घ्यावे लागणार आहेत.

पनवेल तालुक्यातील 24 वर्षीय गतिमंद तरुणीवर अत्याचार केल्यानंतर तिने एका गोंडस मुलीला जन्म दिला. रुग्णालयात तिच्यावर उपचार करण्यात आले. पोलिसांनी गुन्हा दाखल करून आरोपीचा शोध सुरू केला. या प्रकरणात आरोपीची ओळख पटवण्यासाठी पोलिसांनी संशयित व्यक्तींवर लक्ष केंद्रित केले. यावेळी ज्या ठिकाणी ती गतिमंद तरुणी राहत होती, त्या ठिकाणच्या संशयित आठ जणांचे डीएनए नमुने पोलिसांनी घेतले आणि ते कलीना येथे पाठवले. मात्र काही दिवसांनी या डीएनए नमुन्याचा रिपोर्ट पोलिसांना प्राप्त झाला. आठही जणांचे डीएनए नमुने निगेटिव्ह आल्याने तालुका पोलिसांचे काम वाढले आहे. त्यामुळे या तरुणीवर अत्याचार करणारा आरोपी अद्याप पोलिसांच्या हाती लागलेला नसून, त्याचा शोध घेण्याचे मोठे आव्हान पोलिसांसमोर आहे. पोलिसांकडून या प्रकरणाचा अधिक तपास सुरू असून, आणखी संशयितांची चौकशी आणि नमुने तपासण्याची शक्यता आहे.

पोलिसांकडून पीडित तरुणीच्या संपर्कात आलेल्या व्यक्तींची माहिती, घटनाक्रम आणि उपलब्ध पुरावे यांची तपासणी केली जात आहे. तसेच या प्रकरणात आणखी कोणत्या व्यक्तींचा सहभाग किंवा संशयास्पद हालचाली होत्या का, याचा तपास केला जात आहे. दरम्यान, पीडित तरुणीने एका मुलीला जन्म दिल्याने या प्रकरणाचे गांभीर्य अधिक वाढले आहे. गतिमंद तरुणीच्या असहाय्यतेचा गैरफायदा घेत तिच्यावर अत्याचार करणाऱ्या व्यक्तीला शोधून त्याच्यावर कठोर कारवाई करण्याची मागणी होत आहे. आठही संशयितांचे डीएनए नमुने निगेटिव्ह आल्याने तपासाला वेगळे वळण मिळाले आहे.

आठ संशयितांचे डीएनए नमुने निगेटिव्ह आले असले तरी तपास थांबलेला नसून, या गंभीर प्रकरणातील खऱ्या आरोपीचा शोध घेणे हे पोलिसांसमोरचे प्रमुख आव्हान आहे. या प्रकरणी वपोनि गजानन घाडगे यांच्या मार्गदर्शनाखाली सहाय्यक पोलीस निरीक्षक सुभाष डीगे अधिक तपास करत आहेत.