वन्यजीव संरक्षण क्षेत्रातील उल्लेखनीय कार्याची दखल
अलिबाग तालुक्याला प्रथमच मान
| पाली/बेणसे | प्रतिनिधी |
वन्यजीव संरक्षण, पर्यावरण संवर्धन आणि जनजागृती क्षेत्रातील उल्लेखनीय कार्याची दखल घेत महाराष्ट्र वन व महसूल विभागाने डॉ. प्रसाद दाभोळकर यांची रायगड जिल्ह्याचे मानद वन्यजीव रक्षक म्हणून नियुक्ती केली आहे. विशेष म्हणजे, अलिबाग तालुक्यातील व्यक्तीला प्रथमच हा बहुमान मिळाला आहे.
डॉ. दाभोळकर हे वाइल्ड लाईफ वॉरियर्स संस्थेचे संस्थापक अध्यक्ष असून, गेल्या सहा वर्षांत त्यांच्या नेतृत्वाखाली सहा हजारांहून अधिक जखमी व संकटग्रस्त वन्यजीवांचे यशस्वी बचावकार्य करण्यात आले आहे.
वन्यजीव बचावासोबतच ते शाळा-महाविद्यालयांमध्ये पर्यावरण जनजागृती, वन विभागाच्या कर्मचाऱ्यांसाठी प्रशिक्षण, तसेच सर्पदंश प्रतिबंध आणि योग्य उपचारांबाबतही सातत्याने कार्य करत आहेत. त्यांचे दोन संशोधन निबंध आंतरराष्ट्रीय नियतकालिकांत प्रसिद्ध झाले असून, वनस्य कथा रम्या या लोकप्रिय सदरातून त्यांनी वन्यजीव संवर्धन आणि मानव-वन्यजीव सहजीवनाविषयी प्रभावी लेखनही केले आहे. या नियुक्तीबद्दल वन्यजीवप्रेमी, सामाजिक संस्था आणि विविध स्तरांतून डॉ. प्रसाद दाभोळकर यांच्यावर अभिनंदनाचा वर्षाव होत आहे.