। पनवेल । दीपक घरत ।
नववर्ष स्वागतासाठी सज्ज झालेल्या रायगडकरांनी दारू पिण्यासाठी तब्बल दीड लाख परमिट काढले आहे. यामध्ये देशी आणि विदेशी अशा दोन्ही प्रकारच्या परमिटचा समावेश असून, दोन रुपये आणि पाच रुपये दराने उपलब्ध असणार्या या परमिट विक्रीतून राज्य उत्पादन शुल्क विभागाला लाखो रुपयांचा महसूल प्राप्त झाला आहे.
यंदाचे नववर्ष हे जल्लोषात साजरे केले जाणार आहे. नववर्षात मद्यविक्री ही मोठ्या प्रमाणात होत असते. तसेच दारू पिणार्यांचे प्रमाणही जास्त असते. अशा दारू पिणार्यांना दारू पिण्यासाठी परवाना गरजेचा असतो. जिल्ह्यातील तब्बल 1 लाख 49 हजार नागरिकांनी दारू पिण्याचे परमीट घेतले असून नव्या वर्षाचे स्वागत फुल्ल टल्ली होऊन केले जाणार असल्याचे या आकडेवारीवरून स्पष्ट झाले आहे.
नव्या वर्षाचे स्वागत करण्यासाठी राज्य भरातून पर्यटक रायगड जिल्ह्यातील अलिबाग तसेच इतर पर्यटन स्थळ असलेल्या ठिकाणी येत असतात. नववर्षाच्या स्वागतासाठी 31 डिसेंबर पूर्वीच पर्यटक पर्यटनस्थळी दाखल होत असल्याने आतापासूनच जिल्ह्यातील प्रसिद्ध पर्यटनस्थळे पर्यटकांनी हाऊसफूल झाली आहेत. नववर्षाचे स्वागत करताना अनेक जण मद्यपान करण्यास पसंती देत असल्याने एका दिवसात देशी-विदेशी प्रकारच्या हजारो लिटर मद्याची विक्री होत असते.
या काळात गैरप्रकार होऊ नये, याकरीता नववर्षाच्या स्वागतासाठी आयोजित कार्यक्रमांवर आणि मद्यविक्री केंद्रावर पोलिसांची करडी नजर असते. विना परवाना दारू पिणार्यांवर पोलीस कारवाई करत असल्याने पोलिसांच्या कारवाईपासून वाचण्यासाठी अनेकजण राज्य उत्पादन शुल्क विभागाकडून दारू पिण्यासाठी उपलब्ध करून देण्यात येणारे एक दिवसीय परमीट खरेदी करतात. राज्य उत्पादन शुल्क विभाग यासाठी विदेशीसाठी पाच आणि देशीसाठी 2 रुपये दर आकारते.
1 लाख नागरिकांनी काढले ऑफलाईन परवाने
राज्य उत्पादन शुल्क विभागाकडून देण्यात आलेल्या माहितीनूसार रायगड जिल्ह्यात विदेशी मद्य पिण्यासाठी 1 लाख नागरिकांनी ऑफलाईन पद्धतीने एका दिवसाचे परवाने काढले आहेत; तर 49 हजार नागरिकांनी देशी मद्य पिण्यासाठी ऑफलाईन पद्धतीने परवाने काढले आहेत. या संख्येत ऑनलाईन पद्धतीने परवाने काढणार्यांची संख्या समाविष्ठ नाही.
कायस्वरुपाच्या परवान्यासाठी 1 हजार रुपयांचा दर
देशीसाठी 2 रुपये आणि विदेशीसाठी 5 रुपये दराने एका दिवसासाठी परवाने उपलब्ध आहेत. तर वर्षभराच्या परवन्यासाठी 100 रुपये तर कायमस्वरूपीसाठी एक हजार रुपये शुल्क आकारण्यात येते.