खारघरमधील खेळाच्या मैदानात मद्यपानाचे प्रकार

| पनवेल | प्रतिनिधी |

खारघरमधील सेक्टर 16 येथील खेळाच्या मैदानावर पालिकेने सुरक्षारक्षकांची संख्या कमी केल्यानंतर पुन्हा मद्यपींचा वावर वाढल्याने परिसरातील नागरिकांमध्ये नाराजी व्यक्त होत आहे. रात्रीच्या वेळी मैदानावर दारू पार्ट्या होत असल्याचे समोर आले आहे. यापूर्वीही या मैदानावर मद्यपानाचे प्रकार उघडकीस आल्यानंतर स्थानिक जय हिंद स्पोर्ट क्लब यांनी पालिकेकडे तक्रार केली होती. त्यानंतर काही काळासाठी सुरक्षारक्षक तैनात करण्यात आले होते. मात्र, अलीकडेच रक्षकांची संख्या कमी होताच पुन्हा गैरप्रकार सुरू झाल्याचे दिसून येत आहे. स्थानिकांच्या माहितीनुसार, भूखंड क्रमांक 13 वरील मैदानात काही तरुण रात्री उशिरापर्यंत मद्यपान करून रिकाम्या बाटल्या, प्लास्टिक ग्लास आणि कचरा टाकून जातात. रात्री दुचाकी व चारचाकी वाहनांद्वारे मद्यपी मैदानात येतात. पालिकेचे उपायुक्त प्रसंजीत कार्लेकर यांनी याबाबत सुरक्षा विभागाकडे चौकशी केली जाईल, असे सांगितले.