न्यूझीलंडचा नेदरलँडवर 99 धावांनी विजय
| नवी दिल्ली | वृत्तसंस्था |
न्यूझीलंडने विश्वचषकातील सलग दुसऱ्या सामन्यात विजय मिळवला आहे. सोमवारी झालेल्या सामन्यात न्यूझीलंडने नेदरलँडचा 99 धावांनी पराभव केला. मिचेल सँटरनरच्या फिरकीपुढे डचच्या फलंदाजांनी लोटांगण घातले. मिचेल सँटनरने नेदरलँडच्या पाच फलंदाजांना तंबूत पाठवले. दुसऱ्या विजयासह न्यूझीलंडने गुणतालिकेतील स्थान आणखी मजबूत केले आहे. न्यूझीलंड नेदरलँडचा पराभव करत चार गुणांसह पहिल्या स्थानावर विराजमान झाला आहे. न्यूझीलंडने प्रथम फलंदाजी करताना 323 धावांचा डोंगर उभारला. न्यूझीलंडकडून सलामी फलंदाज विल यंग याने 80 चेंडूत 70 धावांची खेळी केली. त्याशिवाय कीवी कर्णधार टॉम लेथम याने 46 चेंडूत 53 धावा चोपल्या. तर रचिन रवींद्र याने 51 चेंडूत 51 धावांचे योगदान दिले. त्यानंतर नेदरलँडला 46.3 षटकांमध्येच 223 धावांत गुंडाळले. न्यूझीलंडने नेदरलँडचा 99 धावांनी पराभव केला. नेदरलँडचा हा सलग दुसरा फराभव होय. याआधी नेदरलँडचा पाकिस्तानने पराभव केला.
मिचेल सँटनरच्या भेदक माऱ्यापुढे नेदरलँडच्या संघाला फक्त 223 धावांपर्यंत मजल मारता आली. नेदरलँडकडून कॉलिन एकरमैनने एकाकी झुंज दिली. त्याने 73 चेंडूंत 69 धावांची खेळी केली. त्याने आपल्या खेळीत पाच चौकार ठोकले. डच कर्णधार स्कॉट एडवर्ड्स याने 27 चेंडूंत 30 धावांचे योगदान दिले. यांचा अपवाद वगळता एकाही डच फलंदाजाला मोठी केळी करता आली नाही. स्वस्तात सर्व फलंदाज तंबूत परतले. परिणामी, न्यूझीलंडचा डाव 223 धावांत आटोपला. न्यूझीलंडकडून मिचेल सँटनर याने भेदक मारा केला. सँटनर याने पाच गडी बाद केले. तर, मॅट हैनरीने 3 फलंदाजांना तंबूत पाठवले. रचिन रवींद्रने एक गडी बाद केला. नेदरलँडकडून आर्यन दत्त, वान मीकेरम आणि वान डर मर्व यांनी प्रत्येकी दोन-दोन, तर बेस डी लीडे याने एक गडी बाद केला.