निवडणुकीसाठी साडे आठ हजार यंत्र

कंट्रोल युनिटसह बॅलेट युनिट मशीनचा साठा उपलब्ध

| रायगड | प्रमोद जाधव |

प्रदिर्घ कालावधीनंतर रायगड जिल्हा परिषद व पंचायत समितीच्या निवडणुकीचा कार्यक्रम जाहीर झाला आहे. या निवडणुकीच्या पार्श्वभूमीवर प्रशासकिय कामकाज योग्य पद्धतीने व्हावे, यासाठी हालचाली सुरु झाल्या आहेत. जिल्हा परिषदेच्या 59 व पंचायत समितीच्या 118 जागांसाठी होणाऱ्या निवडणुकीसाठी साडेआठ हजार इलेक्ट्रॉनिक मतदान यंत्र उपलब्ध आहेत. त्यामध्ये 2,500 कंट्रोल युनिट व 5,950 बॅलेट युनिट मशीनचा समावेश आहे. जिल्हा प्रशासन या निवडणुकीसाठी सज्ज असून त्याची तयारी पूर्ण झाली असल्याची माहिती जिल्हाधिकारी किशन जावळे यांनी दिली.

रायगड जिल्हा परिषद व पंचायत समितीच्या निवडणूकीच्या निमित्ताने बुधवारी (दि.14) पत्रकार परिषदेचे आयोजन करण्यात आले होते. यावेळी जिल्हाधिकारी जावळे बोलत होते. जिल्हा परिषद व पंचायत समितीच्या निवडणुकांचा कार्यक्रम जाहीर झाला आहे. त्यामुळे निवडणूकीचा निकाल जाहीर होईपर्यंत जिल्ह्यात आचारसंहिता असणार आहे. ही निवडणूक शांततेत व सूरळीत पार पाडण्यासाठी प्रशासन यंत्रणा सज्ज झाला आहे. जिल्ह्यातील कायदा व सुव्यवस्था अबाधित राखण्यासाठी पोलिसांच्या मदतीने प्रतिबंधात्मक कारवाई केली जाणार आहे. या निवडणूकीसाठी 16 ते 21 जानेवारी या कालावधीत उमेदवारी अर्ज स्विकारले जाणार आहेत. तसेच, पारंपारिक पद्धतीने ऑफलाईन अर्ज स्विकारण्याची व्यवस्था करण्यात आली आहे. यावेळी जिल्ह्यामध्ये 17 लाख 381 मतदार 5 फेब्रुवारीला मतदानाचा हक्क बजावणार आहेत. हे मतदान सकाळी 730ः ते सायंकाळी 530ः यावेळेत 2,323 केंद्रामध्ये होणार आहे. यावेळी सर्वात जास्त पनवेलमध्ये तर सर्वात कमी तळामध्ये मतदार आहेत. मतदान प्रकीया शांततेत व सुरळीत पार पाडण्यासाठी प्रशासन यंत्रणा सज्ज झाली आहे. यावेळी इलेक्ट्रॉनिक मतदान यंत्र साडेआठ हजारहून अधिक आहेत. त्याची व्यवस्थादेखील करण्यात आली असल्याची माहिती जिल्हाधिकारी जावळे यांनी दिली आहे.

खर्चाच्या मर्यादा
रायगड जिल्हा परिषद व पंचायत समितीच्या निवडणुकीसाठी उमेदवारी अर्ज 16 ते 21 जानेवारी या कालावधीत दाखल होणार आहे. या कालावधीत उमेदवारांना खर्चाची मर्यादा देण्यात आली आहे. जिल्हा परिषदेच्या निवडणुकीसाठी 6 लाख रुपये, तर पंचायत समितीच्या निवडणूकीसाठी 4 लाख 50 हजार रुपये खर्च करण्याची मुभा देण्यात आली आहे.

चारित्र्य हणन करणे पडणार महागात
रायगड जिल्हा परिषद व पंचायत समिती निवडणुकीच्या कालावधीत ठिकठिकाणी सभा, बैठका होणार असून अनेक ठिकाणी रॅलीदेखील काढल्या जाणार आहेत. या निवडणुकीत आरोप प्रत्यारोप एकमेकांविरोधात केले जाणार आहेत. मात्र, चारित्र्य हणन होणार नाही. पातळी ओलांडून व्यक्तीबद्दल बोलले जाणार नाही याकडे लक्ष देण्याचे काम प्रशासनाकडून केले जाणार आहे. त्यामुळे चारित्र्य हणन करणारे भाषण करणे यावेळी महागात पडणार असल्याचे जावळे यांनी सांगितले.

मोबाईल ॲपमधून मतदारांची माहिती
जिल्हा परिषद व पंचायत समितीच्या निवडणूकीची रणधुमाळी सुरु झाली आहे. मतदार यादी नाव शोधण्यासाठी मतदारांचीदेखील धावपळ सुरू झाली आहे. ही धावपळ कमी करण्यासाठी निवडणूक आयोगाने सोशल मिडीयाचा आधार घेतला आहे. आधुनिकेतचा वापर करीत निवडणुक आयोगाने मोबाईल ॲपची मदत घेतली आहे. या ॲपमार्फत मतदारांना घरबसल्या मतदार यादीमधील नाव शोधता येणार आहे.

मतदार संख्येवर दृष्टीक्षेप