भरधाव ट्रकच्या धडकेत वृद्धाचा मृत्यू

| नवी मुंबई | प्रतिनिधी |

ठाण्याहून बेलापूरच्या दिशेने जाणाऱ्या भरधाव ट्रकने रस्ता ओलांडून जाणाऱ्या एका 69 वर्षीय ज्येष्ठ नागरिकाला धडक दिली. ट्रकने वृद्धाला काही अंतर फरपटत नेल्याने त्याचा जागीच मृत्यू झाल्याची घटना बुधवारी (दि.20) रोजी दुपारी ठाणे-बेलापूर मार्गावरील रबाळे येथे घडली. या अपघातानंतर पळून गेलेल्या ट्रकचालकाला रबाळे एमआयडीसी पोलिसांनी अटक केली आहे. या अपघातात मृत झालेल्या वृद्धाचे नाव तुकाराम एकनाथ तुळजापुरे (69) असे असून ते रबाळे येथील भीमनगरमध्ये राहत होते. बुधवारी दुपारी तुळजापुरे हे आपल्या कामानिमित्त रबाळे येथे गेले होते. त्यानंतर दुपारी सव्वातीन वाजण्याच्या सुमारास ते आपल्या घरी परतत होते. दरम्यान, ते ठाणे-बेलापूर मार्गावरील रबाळे येथील सिग्नलजवळून रस्ता ओलांडून भीमनगर येथे जात होते. या वेळी ठाण्याहून बेलापूरच्या दिशेने जाणाऱ्या भरधाव ट्रकने तुळजापुरे यांना धडक दिली. ट्रकचालकाने ट्रक न थांबवता तसाच पुढे नेल्याने तुळजापुरेदेखील काही अंतर ट्रकसोबत फरपटत नेले. यात तुळजापुरे हे गंभीर जखमी होऊन पडल्यानंतर ट्रकचालकाने पलायन केले. रबाळे एमआयडीसी पोलिसांना या घटनेची माहिती मिळाल्यानंतर पोलिसांनी घटनास्थळी धाव घेऊन जखमी तुळजापुरे यांना रुग्णालयात दाखल केले. मात्र त्यापूर्वीच त्यांचा मृत्यू झाल्याचे डॉक्टरांनी घोषित केले. या घटनेनंतर पोलिसांनी या अपघातातील पळून गेलेला ट्रकचालक कुलदीप राम खिलावन (23) याच्याविरोधात गुन्हा दाखल करून त्याला अटक केली आहे.