निवडणूक आयोगाचा राजकीय पक्षांवर अंकूश
| नवी दिल्ली | वृत्तसंस्था |
निवडणूक प्रक्रिया आणखी पारदर्शक करण्यासाठी निवडणूक आयोगाने राजकीय पक्षांना मिळणार्‍या देणग्यांची रक्कम कमी करण्याचा प्रस्ताव केंद्रीय वित्त मंत्रालयापुढे मांडला आहे. यामुळे करचुकवेगिरीला आळा बसणार असल्याचे सांगितलं जात आहे.
मुख्य निवडणूक आयुक्त राजीव कुमार यांनी याविषयी माहिती दिली आहे. राजकीय पक्षांना जर 20 हजारापेक्षा अधिक रकमेच्या निनावी देणग्या आल्या असतील तर त्याची माहिती निवडणूक आयोगाला देणं बंधनकारक असतं. मात्र आता नव्या नियमानुसार आता पक्षांनी 2 हजारापेक्षा जास्तच्या देणग्यांची माहिती आयोगाला देणं गरजेचं असेल, असं या प्रस्तावात म्हटलं आहे.
याशिवाय 2000 रुपयांच्या वरचे सगळे व्यवहार ऑनलाईन पेमेंट किंवा चेकच्या माध्यमातून व्हावेत, अशी मागणीही आयोगाने केली आहे. काही दिवसांपूर्वी आयकर विभागाने कर चुकवणार्‍या काही पक्षांवर कारवाई केली होती. याशिवाय नोंदणी नसलेल्या 284 पक्षांवर कारवाई केली होती.
