निवडणूक आयोगाची देशद्रोही कृत्ये

आदित्य ठाकरे यांचा गौप्यस्फोट

| मुंबई | प्रतिनिधी |

शिवसेना (उद्धव ठाकरे) पक्षाचे आमदार आदित्य ठाकरे यांनी निवडणूक आयोगाची देशद्रोही कृत्ये लवकरच जगासमोर आणणार असल्याचे वक्तव्य त्यांनी केले आहे. पुढच्या काही दिवसांत निवडणूक आयोगाच्या देशद्रोही कृत्यांचे गौप्यस्फोट आम्ही करणार आहोत, असा इशारा त्यांनी ट्विटरवरून दिला आहे.

शिवसेना ठाकरे गटाच्या एका पदाधिकाऱ्याने महापालिकेतील मध्यवर्ती निवडणूक यंत्रणेकडून रीतसर शुल्क भरून प्रारूप मतदार यादी घेतली होती. त्या यादीवर 14 नोव्हेंबरची तारीख आहे. तर, सर्वांसाठी प्रदर्शित झालेली यादी ही 20 नोव्हेंबरला प्रदर्शित झाली आहे. या यादिवरील तारखांच्या तसेच प्रदर्शनातील गोंधळावरून आदित्य ठाकरे यांनी निवडणूक आयोगाला फटकारले आहे. ते म्हणाले की, हा गोंधळ नव्हे तर देशद्रोहाचा गुन्हाच आहे. काल आमच्या एका पदाधिकाऱ्याने प्रारूप मतदार यादी महापालिकेतील मध्यवर्ती निवडणूक यंत्रणेकडून रीतसर शुल्क भरून घेतली. परंतु, या यादीवरची तारीख 14 नोव्हेंबर 2025 अशी आहे. आणि हि यादी खरी 20 नोव्हेंबर 2025 रोजी सर्वांसाठी ऑनलाईन प्रकाशित झाली. सुरुवातीला ही यादी 7 नोव्हेंबरला येणार होती; परंतु, ती 14 आणि 20 नोव्हेंबर रोजी प्रकाशित झाली, असे आदित्य ठाकरे यांनी ट्विटमध्ये नमूद केले. यावरून आदित्य ठाकरे यांनी निवडणूक आयोगाला काही प्रश्न विचारले असून येत्या काही दिवसांत निवडणूक आयोगाच्या आणखी काही देशद्रोही कृत्यांचे गौप्यस्फोट करणार असल्याचा इशारा दिला आहे.