चिमुकल्या हातांमधील जादू..

रोटरी क्लबच्या चित्रकला स्पर्धेला उत्स्फूर्त प्रतिसाद

| पनवेल | वार्ताहर |

स्वातंत्र्याच्या अमृतमहोत्सवी वर्षानिमित्ताने को.ए.सो. शालेय संकुलातील के.व्ही. कन्या विद्यालय, व्ही.के. हायस्कूल व इंदूबाई वाजेकर इंग्रजी हायस्कूलमधील 5 वी ते 8 वीच्या विद्यार्थी, विद्यार्थिनींसाठी चित्रकला स्पर्धेचे आयोजन करण्यात आले. या स्पर्धेत हजारो विद्यार्थ्यांनी भाग घेतला. या स्पर्धेत विद्यार्थ्यांनी रेखाटलेली चित्रकृती पाहून रसिक मन थक्क व्हावे, अशीच चित्रे तिथे होती. काही विद्यार्थ्यांनी तर इतक्या सफाईने आणि प्रभावीपणे चित्रे रेखाटली की, ती विद्यार्थ्यांनी काढली, यावर विश्वास बसणार नाही.

क्लबचे कलाप्रेमी सदस्य योगेंद्र कुरघोडे यांच्या संकल्पनेला कला शिक्षक पांडुरंग नेरुरकर, मुनीर मुल्ला, सुजाता गायकवाड तसेच तिन्ही शाळांच्या मुख्याध्यापिका प्रगती दलाल, मनिषा पाटील, वैशाली गावित यांनी पुढाकार घेऊन मार्गदर्शन केले. सदर तिन्ही शाळांतून प्रथम, द्वितीय व तृतीय अशी 18 बक्षिसे स्वातंत्र्यदिनी देण्यात येणार आहेत. सदर चित्रकला स्पर्धेच्या वेळी रोटरी क्लब ऑफ पनवेल सेंट्रलचे अध्यक्ष रतन खरोल, सचिव अनिल खांडेकर, माजी अध्यक्ष संतोष घोडींदे, भगवान पाटील, प्रितम कैया, अनिल ठकेकर, योगेंद्र कुरघोडे, ऋषिकेश बुवा यांचे सह शाळेतील शिक्षक-शिक्षिका उपस्थित होते.