TET Exam: दहा हजार शिक्षकांची परीक्षा

गैरप्रकार रोखण्यासाठी कडक उपाययोजना; पनवेलमधील 9 केंद्रांवर 28 जूनला होणार परीक्षा

| रायगड | जिल्हा प्रतिनिधी |

शिक्षक पात्रता (टीईटी) परीक्षा 28 जून रोजी रायगड जिल्ह्यात होणार असून, पनवेल तालुक्यातील नऊ परीक्षा केंद्रांवर तब्बल 10 हजार 203 शिक्षक परीक्षा देणार आहेत. परीक्षेदरम्यान कोणताही गैरप्रकार होऊ नये यासाठी शिक्षण विभाग, जिल्हा प्रशासन आणि पोलीस यंत्रणा सज्ज झाली असून, कडक सुरक्षा व्यवस्था करण्यात आली आहे.

सर्वोच्च न्यायालयाने पहिली ते आठवीसाठी कार्यरत आणि पाच वर्षांहून अधिक सेवा शिल्लक असलेल्या शिक्षकांना टीईटी उत्तीर्ण होण्यासाठी 31 ऑगस्ट 2026 पर्यंत मुदत दिली आहे. त्यानुसार ही परीक्षा घेतली जात आहे. यामध्ये पेपर-1 साठी 4 हजार 432 तर पेपर-2 साठी 5 हजार 771 शिक्षक सहभागी होणार आहेत.
परीक्षा केंद्रांवर वर्गखोल्या, प्रवेशद्वार आणि नियंत्रण कक्षात सीसीटीव्ही कॅमेरे बसविण्यात येणार आहेत. तसेच आधार बायोमेट्रिक, फेस स्कॅनिंग आणि फ्रिस्किंगद्वारे उमेदवारांची तपासणी केली जाणार आहे. पेपर-1 साठी उमेदवारांनी सकाळी 8.30 वाजता, तर पेपर-2 साठी दुपारी 12.30 वाजता केंद्रावर उपस्थित राहणे आवश्यक आहे. निर्धारित वेळेनंतर कोणालाही प्रवेश दिला जाणार नाही, असे प्रशासनाने स्पष्ट केले आहे.

यंदा प्रथमच प्रश्नपत्रिकेच्या प्रत्येक पानावर युनिक नंबर आणि क्यूआर कोड असणार आहे. प्रश्नपत्रिका आणि गोपनीय साहित्याच्या वाहतुकीपासून ते परीक्षा संपेपर्यंतची संपूर्ण प्रक्रिया सीसीटीव्ही आणि व्हिडीओ रेकॉर्डिंगच्या देखरेखीखाली पार पडणार आहे. परीक्षेच्या कामकाजावर देखरेख ठेवण्यासाठी दोन भरारी पथके, एक मुख्य परिरक्षक, नऊ सहाय्यक परिरक्षक, दोन झोनल अधिकारी आणि नऊ केंद्रसंचालकांची नियुक्ती करण्यात आली आहे.

उमेदवारांनी घ्यावयाची दक्षता

आधारकार्ड, पॅनकार्ड, मतदान ओळखपत्र किंवा ड्रायव्हिंग लायसन्स यापैकी एक मूळ ओळखपत्र सोबत ठेवणे आवश्यक.

मोबाईल, स्मार्ट वॉच, डिजिटल घड्याळ, पेजर, पेन आदी साहित्य नेण्यास सक्त मनाई.

सीसीटीव्ही निरीक्षणामुळे चेहरा स्पष्ट दिसेल याची काळजी घ्यावी.

उत्तरपत्रिकेसोबत दोन कार्बन कॉपी असतील.

उत्तरपत्रिकेत सोडविलेल्या प्रश्नांची संख्या नमूद करणे बंधनकारक.

गैरप्रकार रोखण्यासाठी विशेष व्यवस्था

परीक्षा साहित्याच्या वाहतुकीचे व्हिडीओ चित्रिकरण.

केंद्र परिसर, वर्गखोल्या आणि नियंत्रण कक्षात सीसीटीव्ही व्यवस्था.

फिंगरप्रिंट, फेस स्कॅनिंग व फ्रिस्किंगद्वारे तपासणी.

परीक्षा केंद्रांवर पोलीस बंदोबस्त.

परिरक्षक आणि केंद्रसंचालकांची स्वतंत्र नियुक्ती.