येरवडा येथील गोल्फ क्लब उड्डाणपुलावर भीषण अपघात

। पुणे । प्रतिनिधी ।

पुण्यात गेल्या काही दिवसांपासून अपघाताचे सत्र सुरुच आहे. नवले ब्रीजवरील भीषण अपघाताच्या घटनेला काही आठवडेच उलटले आहेत. अजूनही या घटनेच्या जखमा ताज्या आहेत. दरम्यान, पुन्हा एकदा 7 ते 8 गाड्या एकमेकांना धडकल्याची घटना घडली आहे.

पुण्यातीलच येरवडा येथील गोल्फ क्लब उड्डाण पुलावर गुरुवारी (दि. 27) एक विचित्र अपघात घडला आहे. सुदैवाने या अपघातात कोणतीही जीवितहानी झालेली नाही, मात्र 10 वाहनांचे मोठे नुकसान झाले आहे. गुरुवारी रात्री उशिरा येरवडा येथील गोल्फ क्लब उड्डाण पुलावर 10 वाहने एकमेकांना धडकली. ही वाहने नेमकी कशामुळे एकमेकांना धडकली, याचे कोणतेही कारण समोर आले नाही. ही वाहने एकामागोमाग एक धडकल्यामुळे हा अपघात मोठा झाल्याचे पाहण्यात आले. अचानक ब्रेक दाबल्याने किंवा अन्य कोणत्या कारणामुळे वाहनांच्या चालकांचे नियंत्रण सुटले आणि ही साखळी दुर्घटना घडली असल्याचे प्राथमिक माहितीतून समोर आले आहे. सुदैवाने या भीषण अपघातात कोणतीही जीवितहानी झालेली नाही. मात्र, या दुर्घटनेत 10 ते 12 जण किरकोळ जखमी झाले आहेत. जखमींना तातडीने जवळच्या रुग्णालयात दाखल करण्यात आले असून, त्यांच्यावर उपचार सुरू आहेत. अपघातामुळे या परिसरात काही काळ वाहतुकीची मोठी कोंडी झाली होती.