मुंबई – गोवा महामार्गावर भीषण अपघात; १ ठार,१० जखमी

| माणगाव | सलीम शेख |

          मुंबई – गोवा राष्ट्रीय महामार्गावर माणगावपासून १ किलोमीटर अंतरावर असणाऱ्या कळमजे पुलाजवळ मुंबई – मालवण शिवशाही बस  व अशोक लेलंडमध्ये समोरासमोर जोरदार धडक लागून भीषण अपघातात झाला. या अपघातात एकाच मृत्यू झाला असून १० जण जखमी झाले आहेत. सदरील अपघात बुधवार दि. २६ नोव्हेंबर २०२५ रोजी सकाळी ७ : १५ वाजण्याच्या सुमारास घडला. या अपघातात दोन्ही वाहनाचे नुकसान झाले असून शिवशाही बसचा दर्शनी भागापासून मागील काही भाग कापून गेला आहे. या अपघाताची माहिती समजताच माणगाव पोलीस ठाण्याचे पोलीस निरीक्षक निवृत्ती बोऱ्हाडे तसेच वाहतूक पोलीस हे आपल्या सहकाऱ्यांसमवेत अपघातठीकाणी तातडीने दाखल होऊन त्यांनी जखमींना औषोधोपचारासाठी माणगाव उपजिल्हा रुग्णालयात तातडीने दाखल केले.

           सदर अपघाताबाबत अधिक माहिती अशी कि, मुंबईहुन मालवणकडे निघालेली शिवशाही बस क्र.एम.एच.०९ – इएम – ९०७४ व माणगाव बाजूकडून येणारी अशोक लेलंड क्र.एम.एच.४३ – सीके.३४२१ या वाहनांची माणगावजवळलील कळमजे पुलाजवळ मुंबई – गोवा राष्ट्रीय महामार्गावर  समोरासमोर धडक लागून भीषण अपघात घडला. या अपघातात शाम सुंदर गावडे वय – ८५ रा.विक्रोळी कन्या मोहरनगर,मुंबई यांचा माणगाव उपजिल्हा रुग्णालयात उपचारादरम्यान मृत्यू झाला. तर अंकुश चंद्रकांत मेस्त्री वय – ५४ रा.आचरा मालवण, शशिकांत शंकर तावडे वय – ७२ रा.पन्हाळे रत्नागिरी, प्रशांत शशिकांत राजशिर्के वय -४० रा.शिंदेवाडी-कोडमला-जि.रत्नागिरी, सुप्रिया सुधाकर मोरे वय – ५५ रा. विक्रोळी – मुंबई, प्रतिभा प्रकाश नागवेकर वय-५९ रा.संगमनेर-जि.रत्नागिरी, आर्या अमित मयेकर वय -३८ रा.संगमेश्वर-रत्नागिरी, गायत्री अमित मयेकर वय – १३ रा.रा.संगमेश्वर- रत्नागिरी, अक्षता अनंत पोळवणकर वय -४०, दीपाली तुकाराम मोकळ वय – ३० रा.आमटेम-रायगड, आयशा अमित मयेकर वय – ६ संगमेश्वर- रत्नागिरी, हे दहाजण किरकोळ जखमी झाले.  हा अपघात अत्यंत भीषण होता. अशोक लेलंडमध्ये सिएनजी गॅस असल्याने त्याचा स्फोट होतो कि काय याची भीती अपघात ठिकाणी उपस्थित असलेल्या सर्वाना वाटत होती. या अपघातामुळे मुंबई – गोवा महामार्गावर काहीकाळ वाहतूक व्यवस्था खोळंबली होती. ती वाहतूक व्यवस्था सुरळीतपणे सुरु राहण्यासाठी वाहतूक पोलिसांनी प्रयत्न केले. या अपघाताची नोंद माणगाव पोलीस ठाण्यात दाखल करण्यात आली असून अधिक तपास पोलीस निरीक्षक निवृत्ती बोऱ्हाडे यांच्या मार्गदर्शनाखाली माणगाव पोलीस करीत आहेत.