मुंबई-पुणे एक्स्प्रेस वेवर भीषण अपघात; एकाचा मृत्यू

| खोपोली | वार्ताहर |

मुंबई-पुणे एक्स्प्रेस वेवर मंगळवारी (दि.12) सकाळी एका ट्रेलरने पार्किंगमध्ये उभ्या असलेल्या कंटेनर, टेम्पो , ट्रेलर या तीन वाहनांना जोरदार धडक दिल्याने चार वाहनाचा विचित्र अपघात झाला. या अपघातात ट्रेलर चालकाचा जागीच मृत्यू झाला आहे. सकाळी 10.30 वा. सुमारास पुण्याहून मुंबईकडे हा ट्रेलर जात असताना तो बोरघाटातील ढेकू या गावाजवळ आला असता, त्याचा ब्रेक फेल झाल्याने त्याने पार्किंगमध्ये उभ्या असलेल्या कंटेनरला पाठीमागून जोरदार धडक दिली, तर पुढे असणार्‍या टेम्पो आणि ट्रेलर यांना घासून अपघात झाला. या धडकेमुळे ट्रेलरच्या केबिनचा चक्काचूर होऊन त्यातून खाली पडलेला चालक पवन कुमार (25) ह्याचा जागीच मृत्यू झाला तर एक जण किरकोळ जखमी झाला आहे. अपघात स्थळी महामार्ग वाहतूक पोलीस यंत्रणा बोरघाट येथील अधिकारी आणि कर्मचारी तातडीने दाखल झाले.