आयपीएलचा अंतिम सामना चेन्नईत

| मुंबई । वृत्तसंस्था ।

इंडियन प्रीमिअर लीग अर्थात आयपीएलच्या सतराव्या हंगामाची सुरुवात झाली आणि सोमवारपर्यंत 6 सामने खेळवण्यात आले आहेत. राजस्थान रॉयल्स, चेन्नई सुपर किंग्स, पंजाब किंग्स, गुजरात टायटन्स आणि कोलकाता नाईट रायडर्सने विजयी सुरुवात केली आहे. लोकसभा निवडणुकीच्या पार्श्‍वभूमीवर बीसीसीआयने 17 दिवसांचे वेळापत्रक जाहीर केले आहे. यात 21 सामने खेळवले जाणार आहेत. आता दुसर्‍या टप्प्यातील वेळापत्रक कधी जाहीर होणार याकडे क्रिकेट चाहत्यांचे लक्ष लागले आहे. बीसीसीआयने आयपीएल 2024 च्या दुसर्‍या टप्प्यातील वेळपत्रक जवळपास निश्‍चित केले आहे, लवकरच याची घोषणा केली जाणार आहे.

या मैदानावर प्ले ऑफचे सामने
आयपीएल 2024 वेळापत्रकाबाबत एक मोठी बातमी समोर आली आहे. मिळालेल्या माहितीनुसार आयपीएलच्या सतराव्या हंगामाचा अंतिम सामना 26 मे 2024 रोजी चेन्नईच्या एमए चिदम्बरम स्टेडिअमवर खेळवला जाणार आहे. तर अहमदाबादच्या नरेंद्र मोदी स्टेडिअमवर क्वालिफायर-1 आणि एलिमिनेटरचे सामने आयोजित केले जातील. तर क्वालिफायरचा दुसरा सामना चेन्नईच्या चिदम्बरम स्टेडिअमवर रंगणार आहे. ग्रुप स्टेजमध्ये तिसर्‍या आणि चौथ्या क्रमांकावर असणार्‍या संघांमध्ये एलिमिनेटरचा सामना होईल. क्वालिफायर-1 मध्ये हरणारा संघ आणि एलिमिनेटरमधला विजेता संघ क्वालिफाय-2 सामना होईल. यातला क्वालिफायर-1 आणि क्वालिफायर-2 मधले विजेता संघ आयपीएलचा अंतिम सामना खेळतील.

बीसीसीआयने दिलेल्या माहितीनुसार गतविजेत्या संघाच्या होम ग्राऊंडमध्ये सलामीचा सामना आणि अंतिम सामना खेळवण्याची परंपरा आहे. यावेळीही ही परंपरा कायम ठेवण्यात आली आहे. आयपीएलच्या गेल्या हंगामात अहमदाबादच्या नरेंद्र मोदी स्टेडिअमवर पहिला आणि अंतिम सामना खेळवण्यात आला होता. कारण 2022 मधये गुजरा टायटन्स चॅम्पियन संघ ठरला होता.

या हंगामात किती सामने
आयपीएल 2024 मध्ये एकूण 74 सामने खेळवले जाणार आहेत. आयपीएलचा गेला हंगाम 60 दिवस चालला होता. आयपीएलच्या ग्रुपमध्ये प्रत्येक सामन्यात विजेता ठरणार्‍या संघाला 2 गुण दिले जातील. तर हरणार्‍या संघाला एकही गुण मिळणार नाही. कोणत्या कारणाने सामना होऊ शकला नाही तर दोन्ही संघांना प्रत्येकी 1 गुण देण्यात येईल. ग्रुपनंतर प्लेऑफचे सामने होतील.