| अलिबाग | विशेष प्रतिनिधी |
रायगड जिल्ह्यातील अलिबाग, महाड, माथेरान, मुरुड जंजिरा, पेण, रोहा, श्रीवर्धन व उरण या 8 नगरपरिषदांच्या सदस्य पदांच्या सार्वत्रिक निवडणूकीसाठी अंतिम प्रभाग रचना जिल्हाधिकारी कार्यालयाच्या संकेतस्थळावर, संबंधित नगरपरिषदांच्या संकेतस्थळावर तसेच नोटीस बोर्डावर दि.7 जून 2022 पासून प्रसिध्द करण्यात येणार आहे, असे जिल्हाधिकारी डॉ.महेंद्र कल्याणकर यांनी जाहीर केले आहे.गेल्याच आठवड्यात जिल्हा परिषदेसह पंचायत समित्यांच्या अंतिम प्रभाग रचना जाहीर करण्यात आली आहे.त्यामुळे येत्या काही दिवसात रायगडातील राजकीय वातावरण ढवळून निघणार आहे.
सर्वोच्च न्यायालयाने दि.4 मे 2022 रोजी दिलेल्या आदेशाची अंमलबजावणी करण्याच्या दृष्टीने मा. राज्य निवडणूक आयोग यांच्याकडील आदेश क्र. रानिआ/नप-2022/ प्र. क्र. 02/का.6, दि.22 फेब्रुवारी 2022 अन्वये जाहीर करण्यात आलेल्या सार्वत्रिक निवडणूकांकरीता प्रभाग रचनेच्या कार्यक्रमाबाबत मा. राज्य निवडणूक आयोगाकडील आदेश क्र. रानिआ/नप-2022/प्र. क्र.02/का.6, दि 6 मे 2022 अन्वये परि 1, 2 व 3 नुसार सुधारीत कार्यक्रम जाहीर केला आहे. दि.10 मार्च 2022 रोजी प्रसिध्द करण्यात आलेल्या नगरपरिषदांच्या प्रभाग रचना, प्रभागदर्शक नकाशे यांवर हरकती व सूचना दि.10 मे 2022 (मंगळवार) ते दि.14 मे 2022 (शनिवार) पर्यंत मागविणेबाबत आदेशित केलेले आहे. प्राप्त हरकतींवर दि.23 मे 2022 पर्यंत जिल्हाधिकारी रायगड यांनी सुनावणी घेवून अभिप्रायासह अहवाल दि.30 मे 2022 पर्यंत ब वर्ग नगरपरिषदांसाठी राज्य निवडणूक आयोग, यांच्याकडे व परिशिष्ट 3 (क वर्ग नगरपरिषदांसाठी) विभागीय आयुक्त, कोकण विभाग यांच्याकडे अंतिम मान्यतेस्तव सादर करण्याबाबत आदेशित केलेले आहे.
त्यानुसार अंतिम मान्यतेस्तव प्रस्ताव विभागीय आयुक्त, कोकण विभाग यांच्याकडे 26 मे 2022 रोजी सादर करण्यात आलेले आहेत. या अहवालानुसार रायगड जिल्ह्यातील अलिबाग, महाड, माथेरान, मुरुड जंजिरा, पेण, रोहा, श्रीवर्धन व उरण या नगरपरिषदांच्या सदस्य पदांच्या सार्वत्रिक निवडणूकीसाठी सादर करण्यात आलेल्या अंतिम प्रभाग रचनेस व परिशिष्टांना विभागीय आयुक्त, कोकण विभाग यांच्याकडील पत्रास 2 जून 2022 अन्वये अंतिम मान्यता देण्यात आली आहे. हे आदेश विचारत घेऊन रायगड जिल्ह्यातील नगरपरिषदांच्या सदस्य पदांच्या सार्वत्रिक निवडणूकीसाठी अंतिम प्रभाग रचना जिल्हाधिकारी कार्यालयाच्या संकेतस्थळावर, संबंधित नगरपरिषदांच्या संकेतस्थळावर तसेच नोटीस बोर्डावर 7 जून 2022 पासून प्रसिध्द करण्यात येणार आहे, असे जिल्हाधिकारी डॉ.महेंद्र कल्याणकर यांनी जाहीर केले आहे.