अखेर शिक्षकांच्या मागणीला यश

महाराष्ट्र माध्यमिक डी.एड् शिक्षक महासंघाचा लढा यशस्वी
| नेरळ | प्रतिनिधी |
डी.एड. शिक्षकांचा प्रवर्ग ‘क’मध्ये समावेश करण्यात आला. मात्र, पदोन्नती पदवीधर शिक्षक यांचा समावेश नसल्याने शिक्षक महासंघाच्या वतीने सातत्याने मागणी केली जात होती. महासंघाच्या पाठपुराव्याला यश आले आहे. त्यामुळे आता डीएड शिक्षक आणि पदवीधर शिक्षक यांचा प्रवर्ग क मध्ये समावेश झाल्याने पदवीधर शिक्षकांमध्ये उत्साहाचे वातावरण आहे.

प्रवर्गामध्ये पदवीधर डी.एड् शिक्षकांचा समावेश नसल्याने अनेक शाळा आपल्या मर्जीनुसार वाटेल तिथे पदवीधर शिक्षक यांना काढून टाकले जात असल्याने त्यांच्यावर अन्याय होत होता. पदवीधर होऊनही दोन वर्षांपेक्षा जास्त कालावधी होऊनदेखील शासनाच्या अधिसूचनेची कार्यवाही होत नव्हती. त्याचवेळी अधिसूचना लागू होत नसल्याने महाराष्ट्र माध्यमिक डी.एड. शिक्षक महासंघाने शासनाच्या विरोधात आंदोलनसुद्धा केले होते. अखेर आंदोलनाची दखल घेऊन प्रवर्ग ‘क’ मध्ये दुरुस्ती करून पदवीधर डी. एड. शिक्षकांचा समावेश प्रवर्ग ‘क’ मध्ये केल्याने पदविधर डी.एड् शिक्षकांना एक निश्‍चित स्थान मिळाले आहे. तसेच पदवीधर आणि पदोन्नती शिक्षक यांच्याबाबत मुख्याध्यापक पदावरील पदोत्रतीचा मार्ग सुद्धा मोकळा झाला आहे.

याकरिता महाराष्ट्र कास्ट ट्राइब संघटनेचे राज्याध्यक्ष बापूसाहेब ससाणे तसेच संघटनेच्या राज्य अध्यक्ष पद्मा तायडे, राज्य राज्य सचिव बाळा आगलावे, राज्य कार्याध्यक्ष नंदकिशोर गायकवाड यांच्या नेतृत्त्वात लढा देण्यात आला. याशिवाय रायगड कास्ट ट्राइब संघटनेचे जिल्हा अध्यक्ष आणि सत्यमेव जयते चळवळीचे रायगड जिल्हा निर्माण संघटक महाराष्ट्र पदवीधर डी एड शिक्षक महासंघाचे सुनील गायकवाड यांचादेखील या लढ्यात महत्त्वाचा सहभाग राहिला होता. तसेच कुंटे, वीर, दिलीप गव्हाळे, भास्कर काळे, दिलीप आवारे, आंबतकर यांनीदेखील डीएड शिक्षक, पदवीधर, पदोन्नती शिक्षक यांच्यावर अन्यायाविरुद्ध लढ्यात सहभाग घेतला.